品牌形象高高在上嘅Rolls-Royce，對大部份人而言，莫講擁有，就算只係坐，亦像個遙不可及嘅夢。不過今日，我呢個夢竟成真，代理邀請我與Rolls-RoyceGhost結伴遊車河，首次出街親試呢部迷你貴族嘅魅力。雖然只係短短一個下午，但Ghost頂級豪華嘅懾人氣勢、內櫳如藝術品嘅造工、既澎湃又內斂嘅馬力足以把我迷暈，欠了夕陽嘅下午，同樣醉人。
記者：許維雅
攝影：黃子偉
Model：Wiyona
迷你貴族
一向對品質要求近乎完美嘅Rolls-Royce，身價非凡，地位超凡，由上世紀初起已經係名人至愛，甚至係皇室御用專車，坐得上去，總有凸顯身份嘅感覺。今次終於有機會一嘗呢種滋味，全因廠方舊年年中推出全新款式Ghost嘅時候，只限於發佈會介紹，唔可以落地實試，於是代理專誠安排今次出街遊車河，讓記者親身試坐呢部迷你貴族有幾豪幾舒適。叫佢做迷你貴族，全因Ghost車身長度較Phantom短了400mm，有BBPhantom之稱，廠方刻意打造一架輕巧版嘅RR，目的當然係想以休閒、年輕嘅形象吸納一眾年輕新血。二話不說，豪宅林立嘅港島南區必然係最佳拍攝地點，而且沿大潭道入，路斜多彎，可以測試一下570匹馬力嘅真正實力。約會地點選擇了筲箕灣，第一眼見到Ghost出場，氣勢逼人嘅感覺非想像般休閒親民，因為佢始終係一架接近5百萬身價嘅RR，經典方形車頭、5.4米長嘅車身仍然係一架巨型富豪車。Ghost嘅定位係強調富豪一族亦可享受自駕樂趣，自問的確好想試試6.6公升V12加雙渦輪增壓引擎嘅威力，但又想充當半日貴族坐於極寬敞豪華嘅後座感受一下RR何等舒適，呢一刻發現原來擁有Ghost最煩惱嘅地方就係做乘客定司機，都有排掙扎。
樂於做乘客
做車版試過揸唔少車，試問有幾多架車會令你樂於坐後排做乘客呢？所以最後都決定安於扮一陣貴族，感受Ghost嘅四輪智能獨立氣墊式懸掛系統吸震表現有幾強。減震器每2.5毫秒就會自行計算一次車廂獨立負載量，並透過電腦作出相應嘅調整。沿途行走大潭道各種不同路面，一樣如坐氣墊般又穩又舒適。超過2.3公噸嘅車重，但V12引擎所輸出嘅澎湃動力實在無可匹敵，上斜入彎暢順嘅表現力證呢部歷來性能最強RR嘅實力。
到達紅山半島，亦係時候走回司機位慢慢欣賞中控台嘅設計，打開對開式車門落車，呢份氣派足以羨煞旁人。坐上司機位，更加恍如走入藝術館，如玻璃箱展品嘅錶板、軚環及車門上嘅電鍍操控按鈕、零瑕疵嘅真皮襯桃木裝潢等，令我雙眼忙個不停地掃射，手亦停不了左按右㩒。正玩得投入興起之際，卻睇見遠處雨雲逐步殺埋身，儘管兩邊車門中間貼心地收藏了一把黑色RR雨傘，唔怕會淋雨，但亦無謂打擾今日充滿豪華雅興嘅一個下午，只好依依不捨地盡快速逃。
引擎：6,592ccV12＋雙Turbo
馬力：570PS/5,250rpm
扭力：780Nm/1,500rpm
傳動：8前速ZF自動波
售價：$480萬起
查詢：28701692（Rolls-RoyceHK）
