「樓市好，有產階級心理上覺得比以前富泰，消費者就更加願意消費；零售好，基層就業都會好。所以，無論如何，特區政府都唔可以推冧樓市啊！利少，你一定要呼籲吓，叫政府做乜都好，千祈唔好學以前董建華搞八萬五。如果死人冧樓，下屆特首一定未上台先落台。」榮叔的茶檔，世民久不久便幫襯。幾十年來，榮叔就是靠這小生意，供完兩個兒子到澳洲讀書。
世民：「榮叔，講句公道說話，其實九七年冧市，唔怪得晒董建華。你記唔記得，特區成立第二日，泰銖貶值，其實金融風暴已經殺緊埋身。我嗰陣仲喺美國讀書，淨係知道當時香港應該算硬淨，仲記得有人話要泰銖韓圜跌到七個一皮，要組團去泰國同韓國掃貨。所以，金融風暴真係唔關八萬五事。」
當年八萬五唔講當無咗
榮叔：「嗰陣時嘅財爺，今日嘅特首，仲話香港會係第一個反彈嘅地方㖭，聖誕節吖嘛，佢無錯喎。我仲記得有人畀左個花名佢，叫佢做聖誕權㖭。不過，佢老闆同班政客，一時，又話啲樓太貴，誓死要隊冧個市，轉個頭，個市跌少少，都未到底，佢哋就出招叫啲未買過樓嘅老散接貨。香港人好善忘，好快就乜都唔記得。」
「唉……」世民心中有千言萬語不知從何說起：「當年，八萬五唔講當無咗，大家㷫過火屎，因為嬲政府唔早響！咁多年以來，真係白癡，先至會質疑，政府點解唔問過立法會先至取消八萬五。上星期，李永達再三公開話，當年政府冇先諮詢立法會，所以唔可以當建屋計劃取消咗……」
榮叔：「梁振英，我哋就話冇權去用選票去教訓佢。李永達係直選議員，講埋的咁嘅廢話，唔通佢做到厭？」
世民：「幾乎全部議員都話要打壓樓市，又話要幫八十後上車，你可以教訓邊個先？」
榮叔：「過兩年，細路出晒身，都係睇吓澳洲啱唔啱養老啦。」
利世民
http://hkliberty.wordpress.com