特區「雙曾」就政改投票問題大演羅生門，難為了直話直說、如實滙報對話內容的職工盟李卓人，事發後一大清早便被煲呔「哦爆」。阿人堅持沒有誤會曾鈺成的意思，也不怕自此升呢為煲呔頭號「眼中釘」，稍後更會就公眾假期問題「死咬」煲呔不放；率先受靶的，當然是未有跟進公眾假期問題的勞工及福利局局長張建宗。
打公仔最關注的除了薪酬水平，自然是假期數目。猶記得煲呔農曆年卅下午參觀沙田花市時，忽然對公眾假期非常肉緊，舉例指今年大年初一碰巧是星期日，結果這日公眾假期安排在周末補放，但此舉變相令五天工作的打工仔少了一天假期，似乎都戥蝕假的打工仔不值，口口聲聲說會要求張建宗跟進，預告今年內或會修例。
「咪以為市民好易呃」
不少打工仔以為煲呔金口一開，張建宗一定不敢怠慢，以後不會再蝕假。但政府日前刊憲宣佈明年公眾假期總數時，卻猶如一盆冷水照頭淋，事關明年五天工作的打公仔更會「蝕假」四天，較今年蝕三天更坎坷。
近日成為政改羅生門導火線的關鍵人物李卓人，原來煲呔開腔後一直追問張建宗何時就公眾假期問題進行諮詢？答案是「零諮詢」，阿人不諱言「我真係接受唔到囉」，炮轟局方怎可能在煲呔落令之下也毫無舉動？難道他以為煲呔真的「一心一意」搞政改，其他事不必認真？
當然，被下屬hea爆的煲呔也有責任跟進事件，絕不應「口響響」在牛年最後一天提出了，踏入虎年就當冇事發生。阿人直指「煲呔喺雙普選問題上呃人啫，冇理由喺公眾假期呢個問題上都做大話王o架？」力促煲呔快快指使張建宗「做啲嘢」，「咪以為市民好易呃」。
今次阿人願意「具名」狂插煲呔與張建宗，不知會否像政改投票問題一樣，晨早流流又再收到「特首辦曾先生」留言，力指有就公眾假期問題諮詢，上演另一場政圈羅生門？