老牌組合Peter&Paul前晚喺會展開騷，六嬸方逸華、陳裘大、何傲兒兩父女同林建名都有捧場。問林建名（大少）有冇見過細佬林建岳（岳少）新歡林寶賢（Michelle），佢話：「好耐冇見佢（岳少），對上一次係舊年家庭聚會，佢冇介紹過新歡畀我識，睇報紙咪見過囉！幾靚呀。」
問佢會唔會學岳少搵番個類似咁上下好條件嘅女友？佢就話：「點解要類似呀？拍拖最緊要有feel。」再問陪過佢入馬場嘅靚女有冇feel呢？佢即刻話：「嗰個唔係女友、都未拖手。」
鍾情後生女
再問大少揀女友除咗要有feel之外，係咪後生都好緊要呢？佢諗都唔諗就話：「後生冇錯o架！心境都年輕啲吖嘛，不過起碼都要18歲、但就冇上限嘅。」18歲咪仲細過你啲女？大少又好抵死講：「我啲女唔會唔批准我拍拖嘅。」問佢鍾情後生女，會唔會考慮旗下o靚模Yumi呢？大少就話：「佢係公司藝人咋，同埋佢都已經有男朋友啦！」
