「人生會遇到嘅不如意事數之不盡，失意時都要相信希望在明天，鼓起勇氣向前行。」記者眼前的阿芳總是帶着笑意，幸福快樂掛在面上。誰想到這個樂天小女子曾經歷不如意。九年前，她與丈夫離婚，三十出頭小女人帶着兩個女兒出走，生活難關接踵而來，但阿芳不認命，甘心放下尊嚴換取兩餐溫飽，因她始終相信，再難過始終要過。得失只一念，離婚，其實未必是世界末日。
40歲的阿芳，21年前已嫁為人婦，大女今年20歲，在香港理工大學修讀會計副學士；15歲細女則念中三。一家四口本來居於元朗錦綉花園，過着平凡的生活，但約九年前，暗潮浮出水面，「唔係先生有第二個，只係大家性格唔啱，因了解而分開；佢都冇話要爭番個女。」
男的一揮衣袖，就對三母女撒手不管，阿芳帶着兩個女兒告別錦繡生活，走到悲情城市天水圍。由少奶奶變成單親媽媽，阿芳坦言感覺難受，「兩個女返學，就返去錦繡花園一間快餐店做收銀，朝11晚12，月薪得5,800蚊，朝早5點又要起身幫阿女煮飯。有次細女發燒，只可以叫朋友幫我湊住，諗番真係好心痛。」
積極信念一代傳一代
路難行，但阿芳仍叫自己樂觀面對，堅持不領取綜援，因「唔想俾人覺得冇用、睇唔起」，不過三個月後，不得不違背堅持，「三個人一個月開支成萬蚊，開始頂唔順，朋友叫我唔好再咁硬頸，你唔食，小朋友都要食。」
靠着綜援，阿芳可全職照顧女兒，但單親媽媽要自強，八年來常去做義工，學過電腦及銷售，考了保安資格，只求靠自己雙手賺取薪金，最近還去了婦聯中心學化妝，「咁大個人都未買過化妝品，一試，嘩！OK喎，後生咗十年，即刻好有自信，下次有機會見工一定要化妝。」下個月，她又去學推拿按摩。
是甚麼讓阿芳時刻保持樂觀？「我阿爸呀！當年文革佢試過被人批鬥、抄家、坐監，佢成日同我講，話有得食有得住，已經比起好多人好，何必樣樣嘢都睇到咁灰？」積極信念一代傳一代，阿芳同樣告訴女兒要逆境自強，一家三口每日有說有笑，最愛跑到書店及圖書館，謝絕onlinegame與肥皂劇。
阿芳最愛台灣作家杏林子，杏林子說「除了愛我一無所有」，而阿芳除了婚姻，甚麼也不缺。她對記者說，待女兒將來出身，她要跑到內地山區做義工，為更有需要的人出一點綿力。
記者 夏志禮