下禮拜五佛誕連周末周日一連三日假期，又係短線遊嘅好機會。唔去台灣、日本，仲有乜嘢特別嘅介紹？專門做機票加酒店套餐嘅國泰假期老友Shirley同小妹講，佢哋喺佛誕搵咗食家蔡瀾帶團「三日兩夜蔡瀾成都美食之旅」，「我哋好少做團，今次由蔡生帶住團友食好嘢。」
蔡瀾挑選五間頂級食肆
蔡瀾帶團，價錢一定唔平。Shirley話，坐經濟客位每位要$12,600，坐商務客位要$19,450。但係食同住都係成都最好嘅，除咗入住當地最好嘅酒店世紀城天堂洲際大飯店，蔡瀾仲挑選當地最頂級同地道嘅五間食肆同團友分享。
蔡瀾話，之前好少帶團去內地，因為對內地嘅飲食水準信心不大，不過今次喺成都挑選嘅五家食肆，水準好高。第一日落機會帶團友去成都著名嘅皇城老媽火鍋；夜晚就去龍抄手享用傳統川菜。
小妹都聽過皇城老媽火鍋，入邊嘅佈置好似一座四川歷史同民俗博物館，大廳、廂房、走廊仲放置古蜀三星堆至民國上下過千年嘅文物複製品、老照片，咁嘅環境打邊爐確有一番風味。
蔡瀾又話，第二日會去喻家廚房，嘆私房菜，夜晚去集川菜大成嘅銀杏川菜酒樓。小妹都知呢間銀杏酒樓網羅最好嘅川菜廚師，菜式精緻，裝修有四川民居特色，食飯時段仲有民樂表演，相對價錢亦一啲都唔平。有興趣致電：27474370或瀏覽 http://www.cxholidays.com/chl/zh/r/tours/sOrganized。
電郵：mailto:[email protected]