有人謔稱上海世博做「世界搏擊大會」，因為唔少內地同胞為咗拎張中國館預約飛搞到要自由搏擊。立法會河蟹世博團有中聯辦照住，尊貴議員當然唔使施展「滾地沙」同「鬆踭批頭」就入到中國館。
據報唔少議員入到中國館都嘆為觀止，電子版《清明上河圖》俘虜唔少單純議員嘅歡心，同杜汶澤一樣不禁讚句：中國真係一個「強國」。由中國館去到香港館，唔少議員認為個館比較細、內容比較單薄，言下之意唔知係咪覺得用成幾億興建嘅香港館唔係物有所值？夜晚班議員參加上海市歡迎晚宴，上海市人大常委會副主任胡煒例牌講吓加強兩地合作係雙贏局面之類嘅泛泛之談。跟手大家夜遊黃浦江，今晚返香港。