鍾鎮濤女友范姜未入Bee家，卻為B哥哥生了現時五歲多的鍾懿及三個月大的鍾幗兩名B女。轉數快極的小B女鍾懿絕對是范姜的開心果，一句話要錫到范姜面「扁」為止，不一會又爆料媽咪會打patpat，又要做乖乖家姐湊妹妹，令范姜忙於招架，難怪她以瘋子和儍子形容一對B女，有女萬事足的她，MrsBee名份放一旁。 撰文：梁錦雯
鍾懿的心
鍾鎮濤女友范姜日前帶同其五歲多的小B女鍾懿（Blythe）及僅三個多月大的小小B女鍾幗（Elosie）接受本報母親節專訪，五歲多的鍾懿懂事淡定，鬼馬精靈，一時拉着母親整蛋糕，一時揀花，歌癮起又唱又跳韓國人氣女子組合WonderGirls的hit歌《Nobody》，一副多才多藝的百變小孩，妹妹則乖乖地飲奶睡覺，全程沒扭計沒哭過，一動一靜大對比。
家姐仔意見多多
范姜對兩個B女有獨特的見解：「喺我心目中，佢哋一個係瘋子，一個係儍子，好似B哥介紹咗鍾懿睇《Nobody》嘅MV，鍾懿就癲咗成日喺屋企狂跳，妹妹就儍儍咁望住家姐跳舞，好搞笑。其實鍾懿性格似我，鍾意交朋友心地好，妹妹就有個性啲，好淡定。」
鍾懿是個有主見的小孩，這可見於她在母親節蛋糕簽自己英文名「Blythe」的完美堅持及主張揀黃玫瑰給范姜，以及與妹妹合照又要抱着她錫錫，盡顯家姐的小領袖風範，全賴作為母親諄諄善誘的功勞，范姜表示處理兩姊妹的親子關係十分謹慎，她說：「成日提住自己要做一個公平嘅媽咪，其實妹妹細，大家心思都會擺多啲喺佢度，但都要顧及家姐感受，我成日都同家姐講最錫佢，佢反而會叫我錫多啲妹妹，成日爭住錫『扁』妹妹塊面。自己家咪要安排好時間，湊完家姐返學，咪返屋企照顧妹妹同佢玩，家姐放學，又要跟功課，兩頭兼顧。」
問到鍾懿對於母親節的見解，她即肉緊地攬着母親錫個不停：「媽咪湊我好辛苦，我要錫到佢面『扁』為止，會喺學校畫一張好靚嘅卡，有HelloKitty嘅卡，仲會有禮物，不過要保持神秘。」
自爆被打patpat
問鍾懿怕不怕媽咪，她即爆料說：「最怕媽咪打patpat。」問她因何會打patpat，她即頑皮地笑說：「成日食飯唔洗手，有時唔做功課呀，仲有喺屋企玩火。」在旁的范姜即澄清說：「佢特登喺你面前亂講整蠱我，其實佢平時好驚我，今日蝦我，因為人多。」鍾懿即鬼馬地反問：「今日我乖唔乖？」范姜對於轉數極快的囡囡也難以應付，再問鍾懿錫爹哋還是媽咪多一點，醒目的她即圓滑地說：「爹哋媽咪都錫，最錫係媽咪，畀佢100分。」即時引得在旁范姜笑逐顏開。
范姜的心
作為兩女之母，來自台灣的范姜自言是嚴母，她說：「我好聽媽咪話，佢好嚴，一犯錯就罰得好重，我哋細個做錯事，佢會掟我哋書包出街，仲要我哋去馬路執番，所以我好驚我媽咪。家自己對鍾懿都好嚴謹，加上B哥對佢要求都好高，如果佢做錯嘢，我會掟佢啲玩具去垃圾桶，要佢知道做唔好一件事會鬧佢，例如同佢講好多次，佢都唔聽唔留心唔改，就會罰佢，因為佢都五歲，想佢入小學時train好照顧自己，學識自己冲凉，學識照顧妹妹，所以對佢會堅持嚴格一點。」
為人母親，總有望子成龍的期待，早前鍾懿與B哥於紅館為青海賑災獻唱《閃閃星辰》，絕對有乃父風範，問范姜會否贊成她長大後入行，她說：「佢做邊行都冇所謂，只要佢健康就心滿意足，不過佢已經講過唔做呢行，佢一時話想做護士，做一個靚天使幫人，一時又話要做醫生，佢同爹哋上台唱歌係佢自己鍾意，佢又唔怕醜，好有自信同enjoy，都唔係一件壞事，對佢嚟講係個好好memory。」
兩個夠晒數
范姜全心湊女，私人時間可算是少之又少，為Bee家族成員作愛的奉獻，鍾懿更曾好奇問其母為何不是MrsBee？為何還是single未結婚等問題，十分搞笑。問到未婚媽媽的范姜為何將結婚生B的次序倒轉，她說：「B哥太忙要賺錢，加上我哋湊小朋友真係冇時間，到老咗都可以結婚，隨緣啦。」
問到范姜作為人母的感受，她說：「做媽咪好辛苦，懷胎十月好辛苦，唔係淨指體力上，小朋友唔舒服就好擔心，所以我唔鍾意小朋友病。不過有咗兩個小B女，絕對係開心果，不過開心還開心，真係兩個夠晒數，唔會再生喇。」問她對自己母親這份工的評分，她說：「會畀自己99分，欠1分因為自己要做嘢，唔可以完完全全做到最好。」
場地：agnesb.L.P.G（京士頓街）