正在馬場刨馬之際，萬事德來電，以為德哥有好貼士急call，原來唔係，佢買咗一架台灣名牌智能電話，五個月換咗五條免提耳筒線，佢話條線唔襟用，買原版正貨咯喎，乜啲台灣電話嘅耳筒線咁容易彎o架？德哥一面講，左丁山一概唔明白，喂，自己嘅電話免提耳筒用咗兩年啦，條耳筒線邊會壞o架。萬事德話佢自己同時有一隻芬蘭牌子手機，條耳筒線都係用咗兩年，未曾換過，咁講法，隻台灣牌子係要檢討吓。現在智能電話盛行，左丁山正想將部舊手機換掉，買隻宣傳好勁嘅台灣名牌，聽完萬事德咁講，不如拖住先。
對手機、科技呢啲嘢，非左丁山所長，呢方面，自己有乜問題就搵電腦Ｊ，點知地產Ｗ有乜問題就搵左丁山，點識答呀？地產Ｗ呢排有火，指地產發展商一定要百分百順從九招十二式及市建局八招地監局二十五條，不可推搪，但最令佢個人撞火嘅，就係中咗招，家裏私人電腦收藏嘅二千封電郵畀一個網站吸晒去，每晚收到電郵即被吸走。事緣校友Ｔ太太電郵三張照片畀地產Ｗ，叫佢上某某網站收睇，地產Ｗ照網址一click，就有一連串嘅下一步，下一步（next-step），又有長達幾頁嘅agreement要佢clickyes，地產Ｗ心急睇相，全部yes，yes，yes，睇完相，以為冇嘢啦，點知返回雅虎電郵，發覺所有電郵已經自動轉移晒去上述網站，跟住收到幾封，亦一樣自動「轉移」，地產Ｗ為之大驚，打電話嚟嗌救命，好驚電郵內容已供「神秘人」掃描晒。左丁山聽完只能講句同情，如何應付及recover，唔識喎。但經佢一講，自己對一啲電郵資訊，更加提高警覺，偶有懷疑，一概刪除，寧枉無縱。
科技進步得好快，我哋呢啲老餅無法子追得上嘅，連訊息工程教授Ｐ亦感嘆，十年前為教育網站度咗好多條橋，為連接全港學校網絡，傷咗唔少腦筋，點知到咗今天，十年前諗到嘅繁複互聯網絡計劃，今天㩒吓iPhone就搞掂，小學生都識得應用。咁又係，教授Ｐ搞緊教育網站之時，大家都未聽過Google呢個名字，只識用雅虎搜尋，認為雅虎天下無敵。大公司如此，個人亦如此，千祈唔好以為領先咗就可以穩居一哥位置，後起之秀隨時會在不知不覺間湧現o架。