彭浩翔近年執導的電影製作費動輒過千萬，諷刺是仍未買得起樓，居住跟辦公的地方都要納租，唯一慶幸沒有遇上無良業主，他說：「住嘅地方業主唔志在啲租，辦公室同東華租，話晒慈善機構唔會吓吓加你幾倍租。」但彭導話香港人已習非成是，售樓面積只有七成實用都覺得理所當然，他覺得這是反智的時代。更反智還在後頭，地產發展商何鴻燊的女兒何超儀，居然出錢拍一部鬧父親同業的電影。
撰文：何永寧
導演彭浩翔兩個月來先後有兩部三級電影問世，先有吸煙講粗口的《志明與春嬌》，即將上映的有血腥暴力cult片《維多利亞壹號》。他自言對驚慄血腥片情有獨鍾，他日前接受本報記者專訪時說：「呢套唔算cult片，唔係暴力血腥就係cult。戲裏面嘅暴力係用嚟表達樓市嘅病態，目前樓市瘋狂到都好似殺死你咁，啲人為咗供樓扼殺晒自己嘅生活，呢種無形殺人方式，我用超儀喺戲裏面殺人呢種有形嘅手法表達。」
地產商呃人離晒譜
彭浩翔笑言在戲中殺人的超儀，沒有太多創作人的投射，他說：「殺人只不過係一種渲染，透過影像媒體去發洩不滿，唯一投射咪同超儀一樣，都係買唔起樓囉。老一輩叫我上車先，買住一層放喺度收租，慢慢再樓換樓。我懶，覺得收租麻煩，有心但係冇去揀，拖到家陣都係要租屋住。」彭浩翔笑言近年鍾情看樓宇銷售簡介，他說：「我目前租地方住，屋企成日有啲地產推廣書介紹樓房，我就最鍾意睇，仲會成日圈起啲心水樓，最近就圈咗三間覺得都可以住吓，不過最平嗰間差不多都要3,000萬，最貴嗰間接近6,000萬。」
彭浩翔自言dreamhome是露台可以放得下一張飯枱吃早餐，樓宇大概1,500至2,000呎就差不多，他說：「我諗呢類樓冇兩三千萬都走唔甩，當然我買唔起，所以住嘅地方係租，業主唔志在冇乜加租，office係東華三院物業，慈善機構有良心唔會加你幾倍租。」
樓價升幅太快是元凶，香港人長年被地產商「教育」變成習非成是更是幫兇，他說：「一層樓地產商話有700呎，實用面積得七成幾，即係550呎，啲香港人已經不知幾開心，覺得呢個地產商有良心，呢啲咪習非成是。香港人俾地產商強暴得太耐，有吓唔係咁大力，就覺得佢對你好，香港人都好可憐。不過我呢啲係連俾佢強暴嘅資格都冇，阿Q啲講我又未試過做負資產。」
樓市瘋狂，不少人窮一生精力都未必可以買到樓，特別是一班80後的年輕人，這方面彭浩翔覺得政府責無旁貸，他說：「話又講返轉頭，地產商都係生意人，佢哋當然喺法例許可下賺最大利潤。錯就錯在政府冇定法例去阻止呢啲暴利，好似售樓書一樣已經好大問題。啲圖本身已經呃人，永遠唔知間屋旁邊有乜建築物，除非係種樹你咪唔好畫囉，如果係其他嘢好似焚化爐、污水廠，係咪要畀人知呀。」
忽發奇想以船為家
彭浩翔續說：「我睇報紙見過有幢樓幅牆成31吋厚，又計落建築面積度，最慘畀錢係計你建築面積。我好鍾意睇售樓書，睇吓有幾離譜，原來好多樓嘅電梯槽、電線房個業主有份，唔睇都唔知。」
早年彭浩翔為了不要捱貴樓，曾忽發奇想去考船牌當船民，他笑說靈感來自吳宇森的《辣手神探》，他說：「梁朝偉喺戲度都係住喺架船度，其實有得諗，一架船都係20幾萬，已經有400幾500呎地方，租個船位喺銅鑼灣月租都係6,000至7,000，住銅鑼灣喎！不過因為濕氣重，自己太多書，覺得唔實際。」
樓市瘋狂不及戲中殺人壓價癲，更癲的是現實中拍片資金來自地產商，彭浩翔說：「呢個指控地產商嘅古仔原本想搵Juno（麥浚龍），不過後來超儀話有興趣，我就問佢套戲係控訴地產商，你伯爺（賭王何鴻燊）係地產建設商會會長喎，你有冇問題呀？佢話冇，咁我改動少少就得。」
近日一幢發售的豪宅命名跟片中的凶宅不謀而合，彭浩翔只有無言感激說：「我要多謝個發展商，出動咁多明星幫我宣傳，當然係我用呢個名先啦，亦唔明佢點解會用個咁似嘅名，可能佢未睇套戲。」
故事大綱：無力買樓瘋殺住客
電影《維多利亞壹號》故事講述鄭麗嫦（何超儀飾）一家住在狹小的唐樓，她的夢想便是賺多點錢，給家人買所好房子，可是舊樓拆去，建了私人屋苑，改名為維多利亞壹號，她一直希望能在那裏買一個向海的單位。
鄭麗嫦拚命工作，幹多份兼職，甚至偷賣公司的資料，無非都是想完成心願。經過長年累月的艱苦歲月，終於付了定金，正當一家人高興不已之際，97年樓價狂飆，業主不惜撻定反價甚而封盤。
鄭哀求業主不果，老父（徐少強飾）肺病病情加重，男友（陳奕迅飾）又拒絕借錢，令她明白無論怎樣努力都沒有可能趕上香港的樓市。最終，她精神崩潰，當上連環殺手，向維多利亞壹號的住客埋手，她知道只有讓樓盤變成凶宅，才有機會圓夢。
《維多利亞壹號》上映日期：5月13日
