十之八九嘅奧斯卡電影，例牌懶有深度，《拆彈雄心》係咪叫人反戰，真係公說公有理，但大膽講，你別抱住睇《雷霆救兵》嘅心態欣賞。睇嗰陣，最好先深呼吸，事關逼真嘅聲效表現，確實令拆彈過程變得好緊張，唔信，自己買番隻睇吓！
記者：陳國輝
唔玩BGM更加緊張
無錯，睇戰爭片梗係想試吓屋企隻SubWoofer有幾勁！但好老實，《拆彈雄心》唔單止得少量槍聲同爆炸場面，甚至連背景聲樂（BGM）都無乜，可能你會諗：咁咪好悶？又未必嘅，筆者最難忘係每次準備拆彈時嘅氣氛，例如腳步聲、拆炸彈零件時發出嘅輕微撞擊聲，仲有對講機嘅微弱呼吸聲，加埋晒呢啲肅殺感覺，比起坦克與槍聲更嚟得逼真自然。但都係嗰句，如果睇呢類戲唔夠投入，就只會喊出個「悶」字。
癲喪美軍越拆越開心
故事可以話好簡單，就係一幕又一幕嘅拆彈場景，例如拆咗連結成串嘅炸藥，跟住又到汽車炸彈，講到最難忘，首選必定係拆開小孩肚內炸彈嗰幕，既緊張，又核突，或者女觀眾最怕係血腥，但戲內班美軍似乎越核突越要試，拆彈難度可謂一次堅過一次。唯一想講係，套戲表達咗太多個人主義，例如主角唔聽從軍部命令，搞到班兄弟死埋，同時又以拆炸數量多寡為榮等。究竟係導演想影射美國嘅侵略行為，抑或係表現美軍嘅英雄主義？咁就要大家睇完再判斷。
Man爆女導演談製作
行版Blu-ray幾時返貨，暫時未知，但講到美版嘅Bonus就認真失禮。入面除咗圖片集，其餘只包括故事旁述，以及12分鐘嘅導演及演員專訪，雖然呢啲只係例牌菜式，但各位不妨留意導演嘅訪問片段，研究吓點解一齣咁男性化嘅電影，會由女人所執導。
