呢排大跌市，喺pantry聽到股神阿耀同人傾偈，話要入貨買咩平安咁。我即刻問：「平安保險買得過咩？」點知佢話：「平安包呀！」吓？未到太平清醮邊有得買？
原來平安包已經衝出長洲，榮華為咗配合旅發局香港節慶年，首次推出平安包，白雪雪嘅包入面係蓮蓉，榮華傳訊主任梁雪儀話：「用我哋做月餅嗰啲蓮蓉做o架。」包面嘅平安印係特別訂做，同長洲嗰款差唔多，但包嘅size細啲，「因為香港人一般胃口都細啲。」個包喺19間分店都有得賣，賣$7.5，尖沙嘴天星碼頭新舖會有蒸熱咗嘅，「唔少OL買嚟做早餐o架。」
不同節日均有新搞作
佢話以往只有長洲太平清醮先有平安包，但唔係個個得閒入去買。為咗吸引遊客，仲同旅發局合作，訂咗嚟香港旅遊套票嘅旅客會有贈券，包括送一個包同20蚊現金券，喺5月14日至21日仲會喺機場同尖沙嘴旅客諮詢服務中心送畀旅客，大家有親屬會嚟，提吓佢哋行過就去攞。
榮華嚟緊喺唔同節日都會有新搞作，包括端午節有北海道元貝三色糉，萬聖節有中西crossover嘅南瓜味嘅月餅等等，實行搞「慶」個節慶年。
此外，專賣瑞士人手做高級朱古力嘅Francesca，都會喺端午節推出朱古力套裝，11月仲會搞個course教人朱古力點配紅酒香檳。
電郵：mailto:[email protected]