母親節，曼聯兵不僅要報親恩，還得在收爐戰報答擁躉一整季的支持；姑勿論紅魔能否奇蹟封王，在這場對史篤城的獅子撲兔戲碼必踢好波，1.38倍「主勝」在望，作熱葷過關最合。（球賽編號：星期日46；now631台今日11:00pm直播）藍鑽石
恕我被迫作這個熱燙手的推介，這是由於足智彩堅持開曼聯[-1]而非[-2]，個人假設是操盤手認定曼聯可大勝，只供紅魔捧場客獲微利，當作季尾大酬賓。
曼聯兩員國腳級人馬里奧費迪南及夏格維斯，已於去仗後備上陣；相信前者今仗復任正選機會高，由他取代剛與會方續約的莊尼伊雲斯鎮守中路。即使「里奧」狀態不明，其穩定性肯定勝過莊尼伊雲斯，對曼聯防線總是好事。
朗尼爭神射手必搏
進攻方面，因厄瓜多爾翼鋒路爾斯華倫西亞養傷，令領隊費格遜少了一個用人選擇；相信他會沿用上場拿尼與傑斯的雙翼齊飛陣式，由他倆支援雙箭頭朗尼與貝碧托夫，延續球隊平均每場主場入2.67球的入球率，有何困難？
特別一提是全場戰意最盛者非朗尼莫屬，皆因即使曼聯失落錦標，他都會爭取在射手榜力壓同樣已有26球的杜奧巴，成為本季英超神射手。
史篤城遇強例被炒
沒想到史篤城到季尾仍接連取得佳績，最近繼主場悶和愛華頓後，去仗更作客贏歐霸決賽分子富咸；假如該隊保住目前這個第10排名，那將是球會自1975年以來在頂級聯賽的最高排名。該隊近仗並沒新增傷兵，只有蘇連遜與法耶續避戰，即可沿用去仗對富咸的勝利陣容；是好事，問題是史篤城竟與包尾大蹯樸茨茅夫並列作客入球榜之末，同樣18場只入10球。
史篤城本季初曾客吞利物浦4蛋、早前客吞車路士7蛋，往績反映遇強（姑且當季初的紅軍為強隊）越弱。
筆者不排除該隊有機會在曼聯身上偷雞，成功破門，但相信極其量是一個破蛋的入球。個人今仗波膽心水首選曼聯勝3:1（11倍）、次選4:1（15倍），總之都是「主勝」。
星期日46
曼聯vs史篤城
半全場：主/主
盤口：曼聯[-1]
讓球主客和：H主勝 3:1
《花絮》
法比仔做善事亂「性」
英超煞科戰冇乜壓力嘅阿仙奴，上周五就出席一個為當地兒童醫院籌款嘅慈善晚會；身為隊長，法比加斯（圖）當然不甘後人捐錢，用咗12,000鎊，投得同電影《魔戒》型仔箭手奧蘭多布魯共度一晚，咁咪搞到法比仔「性向」成疑？法比仔事後解釋，因為佢姐姐係奧蘭多布魯粉絲，所以安排佢哋一齊晚餐。前鋒賓特拿就醒好多，用7,000鎊投到歌手JAY-Z嘅簽名tee，就唔怕人哋懷疑啦！
泰維斯送電視發財立品
好多人發財自然立品，好似周薪達12萬鎊嘅曼城前鋒泰維斯（圖），就對球會職員好好人，每人送一部42吋大電視，連斟茶遞水嘅阿姐都有份；不過唔知部電視會唔會內置定泰維斯今季嘅入球片段呢？
安歷卡隨時「大四」喜
曼聯領隊費Sir睇貝碧托夫唔順眼，已經唔係新聞，不過最近傳出佢想搵車仔嘅安歷卡（圖）加盟；安歷卡同車仔仲有一年約，如果雙方傾唔成，曼聯就會插手。如果安歷卡加盟曼聯，真係一時佳話；因佢已經踢過阿仙奴、利物浦同車路士，可能係唯一一位踢過晒Big4嘅球員。
熱刺狂歡京治被抬走
熱刺上仗贏咗曼城，穩得來季歐聯資格，領隊哈利列納都畀班球員放縱一吓；上星期四夜晚，熱刺眾將就喺夜總會飲到「啤啤夫」，踢波受傷被抬離場就成日見，隊長京治（圖）「斷晒片」，要夜店職員扶走，真係少見。
有線「強」谷英超煞科
英超來季的香港直播權易手，now雖然下季冇英超，都冇揸流灘，10場煞科戰全部播足。嚟緊直播英超嘅有線，就搵嚟強尼（圖）同兩個靚女宣傳英超煞科，仲話車仔同紅魔兩場大戰不容錯失，當然重點係：「下季英超在有線。」
