特區雙曾爆出游說辭職投票羅生門，特首煲呔曾噚日晨早睇完報紙，見到有人爆佢大鑊十分緊張，未發出官方聲明前，朝早7點鐘就急call議員發難。爆料嘅李卓人同八方講，噚日起身睇call機，見到朝早7點鐘有人call佢，留言係「特首辦曾先生」，香港得一個特首辦，特首辦入面應該冇第二個曾先生搵佢，所以佢即時覆電話畀煲呔曾。
阿人指呢單嘢煲呔真係好緊張，事關阿人習慣將手機飛線去call台，家陣政府五天工作，噚日朝應該冇人返工，相信煲呔係親自打電話畀阿人，因為飛線所以由call台接電話，傳呼員聽到有人落call「特首辦曾先生」，阿人笑言唔知call台有乜反應，好彩冇當係惡作劇，否則特首落call都冇人理就丟架。
如果驚冇人理，煲呔下次call人可以留名「特首辦Donald曾」，呢個英文名冇人唔識，長毛早前都自訂「D0NALDPK」車牌，噚日拍賣。當拍賣官嗌第一口價時，長毛即時舉手，當大家以為冇人爭時，忽然有隻手舉起，全場嘩然，原來係車牌公司負責人顏先生。既然有人爭，長毛惟有再舉手，顏先生照跟，兩人輪流舉手，唔使一分鐘已經嗌到第13口價。
「D0NALDPK」萬七蚊成交
長毛嗌到17,000蚊時，顏先生終於收韁，「D0NALDPK」由長毛袋袋平安。長毛同八方講，DonaldPK係香港人心聲，佢只係為民請命反映市民心願。
花萬七蚊投得「D0NALDPK」，長毛坦言超出預算，本來預計底價5,000蚊有交易，希望有人贊助吓咁話。上次佢玩梁振英，自訂「CYUSH0」車牌，可惜俾人捷足先登，買家陳先生近日提出以5,000蚊讓番個牌畀佢。
同長毛爭「D0NALDPK」嘅顏先生，承認刻意抬價，批評長毛教壞細路，所以要「罰」佢買貴牌。如此損人不利己，八方覺得仲教壞人。至於噚日拍賣最高價車牌係「GS」以15.5萬元成交，其次係12萬元嘅「CD」，全日總成交額258.2萬元。
mailto:[email protected]