何超儀得到賭王父親何鴻燊斥資1億港元，給她圓電影夢，一口氣以3,000萬拍攝了創業作《維多利亞壹號》和《剖術者》兩部極度血腥的三級片，若然這兩部片全賠，她還有7,000萬彈藥繼續開戲。不過，有說這1億是賭王最後一次放水，以後超儀的電影路是龍是鳳，就要靠自己實力延續下去。
想拍喜劇勵志片
日前超儀在中環接受本報記者專訪，深深感受到老闆不易做，她感嘆說：「以前我真係以為做電影公司老闆大晒，原來仲要睇發行商面色，好似《維》片賣埠時，啲發行商話血腥暴力鏡頭唔夠，但導演有佢嘅唯美睇法，我變咗夾喺中間，左右做人難，又唔識喺合約訂明有finalcut，所以最後我都係接受彭浩翔剪完交嚟嘅版本，佢都係一個唯美主義者，我對佢選擇嘅版本都好有信心，不過以後再拍戲，我一定會學識聰明啲，一定要擁有最後剪片權。」
超儀否認與彭浩翔交惡，她說：「我哋之前都係為部戲好而爭拗，又唔係乜嘢私人恩怨，家已經冇嘢，如果將來佢有好劇本畀我，我唔排除會有再合作機會。其實今次開電影公司做老闆都有啲好窩心嘅事，因為之前要幾位演員去泰國做個面嘅倒模，成班演員都肯即日來回，幫我慳錢，真係唔話得。」
下部要開拍的電影，超儀不想再拍三級片，想改戲路拍喜劇或講述運動員的勵志題材，她說：「我都唔想部部戲都見血，其實有一個講運動員嘅勵志題材我一早想拍，但因為係合拍片，未攞到批文，所以搞咗《維》片先，基本上我係採取開放式，歡迎同任何導演合作，只要有好劇本，計啱成本就冇問題，開電影公司同拍戲都係一盤生意，我都想拍到一啲叫好又叫座嘅電影。」
「往後嘅路靠自己」
賭王出資給超儀開公司拍電影，由始至終，賭王和家人從未給她任何壓力，超儀心驚驚說：「就係因為屋企同爹哋都冇出過任何聲，真係一啲壓力都冇畀過我，爹哋淨係話去做啦！我先至驚呀，不過講真嘅，無論今次開公司做得成唔成功，以後我都唔會再開聲叫爹哋畀錢我拍戲，我都咁大個，冇理由吓吓都伸大手板問屋企攞錢拍戲，爹哋已經幫我好大忙，往後嘅路要靠自己走落去啦！」
撰文：陳月媚