保育界噚日有單大喜事，唔係政府應承唔再拆港人集體回憶，係保育鬥士朱凱迪結婚，幾十個保育天星、菜園村、反高鐵戰友到場恭喜佢，十分熱鬧。
簽婚書嗌口號
新任朱太係傳媒中人，同朱凱迪係舊同事，可能平日嗌慣口號，新娘子噚日簽婚書時，忽然有人高呼「撤回方案」，全場笑到氣咳。朱凱迪保育大過天，噚日有人笑言區佩芬願意下嫁，應獲頒「全球人道大獎」，因為得佢先可接受呢個老公。
兩人在大會堂婚姻註冊處行禮，禮成在外面公園同親友合照，唔知點解一對新人遲遲未現身，大家又玩嘢，叫口號要求釋放佢哋。幾十個菜園村民出城觀禮，好似自己娶新抱咁開心，仲好有心送上自家製心心相印蘿蔔糕，新人切完西式結婚蛋糕再切蘿蔔糕，sweet到爆。
婚禮高潮係新娘子拋花球，結果由「反高鐵停撥款大聯盟」成員葉寶琳奪得，據講佢聲言唔係「恨」嫁，多謝大家禮讓啫。