中午飯局之時，與中貿林講起Dem陳（陳纘揚）中風逝世，喪禮於五月十二日上午九時至十時於鑽石山殯儀館舉行，早一晚（五月十一日）晚上八至九時有基督教追思儀式。中貿林聽後，默然一陣，反過嚟通知在座各位，崇基七二年英文系校友黃奇智於四月二十日因癌症逝世，同於五月十二日上午十一時在鑽石山火葬場進行火化儀式。唉吔，乜咁啱，陳纘揚係新亞工管系，一九七一年畢業，想唔到與黃奇智會在同一地方同一日火化，如果有朋友識齊陳纘揚、黃奇智兩位，可以先後出席兩個儀式。
中貿林講咗，我哋先至知道，黃奇智係上世紀五六十年代有「笛王」之稱嘅黃呈權醫生嘅公子。黃醫生做過東華醫院院長，畢生致力於研究長笛及洞簫，幾乎以醫生為副業。香港校際音樂節於一九六二年起有中樂比賽之設，係黃醫生全力游說教育署之結果。據二○○七年八月二十日《大公報》一篇黃志華寫嘅紀念文字，引述鄭學仁著《吳大江傳》第八十五頁，黃呈權非常欣賞吳大江，經常招呼吳大江回家談音樂，又一齊合作演奏，一九六七年一月中，黃呈權與吳大江在錄音室工作期間中風昏迷，數日後逝世。當年黃奇智正在念預科，家庭頓失經濟支柱，後考入中大崇基書院讀英文系，與母親相依為命，故此為人雖未必多愁，卻非常善感，終生不娶，孑然一身，在音樂藝術方面有所成就。
中貿林話黃奇智生前曾向同學友好贈送父親之音樂錄音帶，現在彌足珍貴。聽完佢講，依稀記得好多年前曾買過黃醫生之洞簫錄音帶，回家後匆忙搜尋，死火，唔知道已經擺咗去邊，自CD面世之後，好多錄音帶已經丟棄咗，都唔知有冇丟埋黃呈權嘅帶㖭。
中風、癌症等等，聽見都心驚驚，如不幸殺到埋身，亦都無可奈何，認命便是。之前本欄寫過流鼻血一事，引起好多朋友關心，來函詢問，謹此多謝。股壇名嘴/英俊小生阿臣哥特別提起，佢返老家與爸爸吃飯，爸爸吩咐佢向左丁山問候致意，因為佢日日睇完陶傑就睇左丁山，唔想左丁山有病停筆也。多謝關心嘞世伯，說也奇怪，日日戴住頂帽之後，居然唔吃敏感藥都停咗流鼻水，好妥當啫！