近年以MissYellow個名進身DJ打碟行列嘅黃泆潼，同廿四味成員阿肥（陳偉雄）拍拖5年一直好哋哋，就算黃泆潼先後俾傳媒影到佢背住阿肥着三點式同男性朋友去嬉水，又或者同老外夜蒲兼俾老外掃玉背，都無礙佢哋兩個情侶關係，仲不時有影皆雙出席活動。
不過，馮仁昭最近收到風，話黃泆潼同阿肥已經散咗，雖然唔知佢哋真正分手原因係乜，但難免令人聯想到同黃泆潼曾俾人影到媾仔嘅事有關。
提分手躁爆
噚日馮仁昭打電話向黃泆潼求證同阿肥分手一事，佢聽到之後諗咗幾秒，然後既冇否認亦冇承認，只係好平靜咁話:「啊……我冇嘢講。」馮仁昭話佢如果回復單身冇人知嘅話，可能會影響到佢結識其他異性朋友嘅機會，但黃泆潼好老定咁話:「唔使驚，我唔擔心。」同阿肥係咪再見亦是朋友？黃泆潼開始有啲唔耐煩咁話:「唔知，你問佢啦，私人嘢我唔講啦！」黃泆潼心情咁差，莫非同分手事件有關！