以錫身聞名嘅律政司司長黃仁龍，噚日首次挑大樑，出席「工商專業政改動力」政改論壇推銷政改爛方案，由於係黃仁龍「破處」登場，所以好多法律界人士都有到場湊熱鬧，資深大律師胡漢清、湯家驊等都有到場。
林D9聞言全程陰陰嘴笑
大家先禮後兵，開壇前握手寒暄，記者趁機問黃仁龍5.16會唔會去投票，佢即時啟動錫身功能，擰晒頭咁話：「我諗我等陣有好多嘢講o架嘞，完晒大家再訪問啦。」記者繼續追問，佢驚青到封口，「我今日係嚟講政改，請大家唔好講其他嘢，好唔好？」見記者步步進逼，佢仲即時離座，向論壇搞手林健鋒求救，好心急咁問：「我哋開始未o架？」
可能黃仁龍少面對呢啲場面，坐喺佢隔籬嘅林D9全程陰陰嘴笑，記者問佢5.16投唔投票，佢自動波做人肉錄音機，「我一路都話靠近選舉，我哋主要官員都會自行決定，大家遲啲再問啦。」記者玩佢，同一問題問多一次，佢果然冇令大家失望，好似㩒咗repeat掣咁，「總之我哋臨近選舉，自行決定。」
高官講政改了無新意，黃仁龍總算有啲新鮮感，噚日引用JPMorgan創辦人JohnPierpontMorgan名句，“Thefirststeptowardsgettingsomewhereistodecidethatyouarenotgoingtostaywhereyouare.”佢繙譯為如果你想往任何地方進發，首要一步，就係你唔選擇在原地逗留。其實都係嗰句，大家要投支持票，否則原地踏步。泛民就話大家唔係唔想行前一步，只係北京冇任何承諾，最驚唔知會行咗去邊，咪仲衰過企喺度！
何俊仁讚辯論能力好強
話雖如此，大家對黃仁龍表現評價不俗，民主黨何俊仁指黃仁龍辯論能力好強，言論比其他官員有說服力，可惜始終要緊跟中央路線政府口徑，講乜都無甚麼新意。既然黃仁龍有觀眾緣，煲呔唔知會唔會搵佢做主力推銷員？
mailto:[email protected]