從來要保「一哥」地位嘅壓力都比爭做「阿一」嘅大。貴為09年MPV銷量冠軍嘅豐田Noah想穩守寶座，當然唔可以故步自封，全新2010年版就引入日本本土版本，頭尾改燈換罩新形象之外，更用上最先進「VALVEMATIC」引擎技術，加大馬力減低廢氣，有埋慳錢又環保呢兩大實用賣點相助，要戰勝一眾七人車敵手嘅攻略，確實如此直接簡單。
記者：許維雅
攝影：周旭文
Model：Fion
容積不變馬力升級
提起MPV七人車之最，大家可能會第一時間諗起巨無霸Alphard，不過論車廂舒適、座位編排靈活程度同樣不相伯仲嘅Noah，似乎憑藉較相宜嘅價錢更吸引一眾愛經濟實惠嘅用家，話佢係近年大熱之選絕非空談，成功取得2009年MPV銷量冠軍就係最佳嘅鐵證。要守住一哥地位，加入日本廠方全新開發嘅「VALVEMATIC」引擎技術就係今次出戰嘅王牌，令全新Noah於引擎容積不變嘅情況下，卻成功加大15匹馬力至158匹、增強2Nm扭力至196Nm，全憑最先進嘅「VALVEMATIC」引擎技術改良引擎結構，令引擎燃油表現有最大嘅發揮。如進氣閥嘅深度加大，令引擎高轉時有充足嘅空氣及燃油進入汽缸燃燒幫助輸出。而進氣閥更會自動調校開關深度，於減速時自行關到最細令油耗相對減低。節汽門嘅打開角度亦比傳統引擎大，加快空氣引入管道加速引擎反應，空氣進入汽缸越快越多，自然可以令燃油燒得更盡，所排放氣體變得更乾淨。
迴旋座椅添溫馨
聽完理論課，大家應該最終想知都係Noah有幾慳油，據代理提供嘅燃油數據，耗油量為13.9km/L，以每公升汽油$14計算，每公里$1左右，夠晒抵用。但講到引擎幾好力幾慳油都唔夠，因為亦需要波箱嘅配合，棄用比較單一化嘅Sport按鈕，改用連加減波嘅七速智慧型無段變速波箱，自己控制行車波檔，令負重較大嘅七人車上落斜時更安全稱心。除了內涵改動不少，外形上亦有不少變化，為Noah帶來新形象，好似全新設計、三橫間粗幼不一嘅鬼面罩，營造更強嘅層次感，微微收窄頭燈嘅闊度，加強頭泵把嘅肌肉感，再加大車頭擾流柵格及霧燈托等設計，都令Noah更顯得醒目有神。而稍作修改嘅車側裙邊包圍及尾泵把，立體設計同樣為整體視覺效果帶來更大動感。最後數到實用上嘅新增配備，搖控電尾門、自動調校光線角度頭燈及為空氣除菌嘅「離子簇」釋放器等等，都為日常貼身需要而設。不過講到最好玩，我就最鍾意配備側向上落及180度迴旋功能嘅中排獨立座椅，一家人可以面對面傾偈就夠晒溫馨啦。
規格
引擎：1,987cc直四DOHCVALVEMATIC
馬力：158PS/6,200rpm
扭力：196Nm/4,400rpm
傳動：七前速無段變速自動波連+/-
售價：$279,870（七座）
查詢：23054555（皇冠車行）
