30/04周五
垃圾波咪大注
一眾同事今晚好緊張，事關係4月擂台終結篇，我哋只係牙骹戰，畀讀者一個參考，唔涉及金錢都仲咁投入，證明對份工仲有團火；但奉勸大家，呢類垃圾波，無謂同佢大大注咯。
閒贏指數：☆☆
01/05周六
曼城可用完即棄
重心推介曼城[-1]，竟在茫茫波海，同投資專家黃國英兄一樣，睇法亦大致相同，最後竟帶點好彩開3:1命中。若然我嘅投資功力，有佢兩成就好咯。但呢隊波越打我越唔欣賞，有啲波真係用嚟賭，用完可即棄！
閒贏指數：☆☆☆☆
02/05周日
買橫濱高興89分鐘
名家撞貼士天天都會發生，我近排對贏唔少，但今天終於中伏。見日乙FC橫濱贏完仲冷過上次，雖說作客對手係更強嘅甲府風林，博大霧買10蚊3:2（50倍），主其他（100倍），開波廿分鐘已領先3:0，今次仲唔發小橫財！可惜高興了89分鐘．．．90分鐘3:3．．．94分鐘被反勝4:3，反被戰鬥員A中正「讓球和」，信心大挫。
閒贏指數：☆☆☆☆
03/05周一
小兵門將又幫手……輸
周一打英超早場，更吸引大量注碼，點知主場嘅韋根單W臨場起票至1.58倍，最後只係可以逼和侯城；而阿仙奴盤路連輸4口，今次點都要喺收爐標次尾會，結果係就係由布力般剋星嘅尹佩斯先開紀錄，可惜兵工廠門將法比安斯基「幫得手」，最後兵工廠反輸1:2！
閒贏指數：☆
04/05周二
美斯，仇人變恩人！
周二真係畀巴塞嚇餐死，事關佢哋完場前仲贏緊係3:1，好彩同甄子丹一樣都係宇宙最強嘅美斯夠勁，喺球證吹雞之前入多粒，個[-2]「主勝」先至開到。美斯之前整4粒我愛隊阿仙奴嘆，不過佢今次幫我中正個有11倍嘅4:1波膽。
閒贏指數：☆☆☆
05/05周三
同日本波八字唔夾
呢期同日本波好似八字唔夾咁，博鯨魚作客贏紅鑽，博輸咗，熱捧鹿角作客贏櫻花都輸埋。最慘係英超「4哥之戰」，以為一定會開「大」，結果熱刺小勝1:0，吹脹。
閒贏指數：☆☆☆
06/05周四
有口話人冇口話自己
都話咗兩回合嘅賽事唔好賭o架啦！點知有口話人，自己又忍唔住手，買荷蘭盃決賽次回合飛燕諾可以喺主場贏番一場，結果咪又損手囉。呢輪頻頻出擊失手，睇嚟係時候要調整一下自己嘅賭波角度同心態。
閒贏指數：☆☆
值得跟進球隊：黑池（有運，今周再追）、
FC橫濱（冇運，短期唔掂）