保皇派為游說溫和民主派通過方案，噚日喺「工商專業政改動力」論壇上軟硬兼施，除有保皇派聲稱，今次通過方案會令民主派增加唔少中間支持者，論壇主持陶傑亦加把口，指普選聯可以搵三個議員出嚟做「死士」投支持票，令到個方案得以通過，陶傑話呢招叫草船借箭，三個「死士」最多俾人鬧到7月，之後就名留千古。
相信冇人敢做
陶傑話做死士唔係無先例，1939年國民黨汪精衛離開重慶走去南京，就係因為當時佢老闆蔣介石驚打唔過日本，叫定汪精衛去日本做死士補飛；萬一打唔過日本，起碼都仲有汪精衛同日本打圓場。
普選聯召集人馮偉華聽到反問陶傑：「你唔係唔知汪精衛下場係點，死梗嘅喎。」陶傑話屆時要由政府接波，搵梁振英或唐唐，先答應畀民協馮檢基同街工梁耀忠做副局長，咁就唔驚佢哋下屆連任時冇票而冇得撈。呢單咁高風險政治買賣，相信泛民中人冇人敢做。