扮嘢節目最怕唧你唔笑，一旦點中觀眾笑穴，真係想叫停都幾難，所以橋不怕舊，最緊要受，無綫近日炮製由汪明荃、阮兆祥、王祖藍和李思捷孭飛的綜藝節目《荃加福祿壽》，三男犧牲色相扮女人，引爆連番笑彈。今晚播出的一集，祥仔更變身梁洛施發言人兼飲食節目《覓食天下》主持盧覓雪，「兩姊妹」飯局上對飲互寸，還密謀出招搶Twins飯碗。
撰文：比華利
正版最忌老翻，汪明荃、阮兆祥、王祖藍和李思捷演出的綜藝節目《荃加福祿壽》，擺到明扮嘢，熱玩娛圈新聞人物。身為大師兄的祥仔，在今晚的一集破格大玩互動，他先「變性」玩老友盧覓雪，這位膽大包天的老翻之後還會出場挑戰正貨。
變身花45分鐘
祥仔由真身變成「A貨盧覓雪」的全個整妝過程，只花了短短45分鐘，甚有效率，但論趣味卻不遜於鏡頭前。外景當天下午4時，祥仔睡眼惺忪、一身T恤牛仔褲便裝趕到尖沙嘴，甫到便坐在化妝枱前，讓化妝和髮型師進行四手變身。
化妝師先在祥仔臉龐上粉，遮掩男士粗大毛孔，然後黐上假眼睫毛和上彩妝，最後細心用遮瑕膏遮走頸上幼紋，與此同時，髮型師則動手為祥仔戴上假髮，再慢慢梳貼在髮尾束髻。當化妝和髮型差不多竣工，負責服裝的工作人員即給祥仔遞上準備好的大碼胸圍、黑色背心連身裙和魚網絲襪，他隨即快手快腳躲在屏風後更換。祥仔自問身形較高大，反串女人時，偏大的胸圍和高踭鞋全部要度身訂做，他說：「之前服裝間的大碼鞋都唔啱我着，一着得唔舒服，表現必定唔自然，所以公司家都幫我哋訂做。」
祥仔男變女後，魅力果然沒法擋，媚態十足，他貪靚得在直身鏡前不停整理衣飾。最後祥仔戴上紅色星星耳環和鮮紅高踭鞋，整個造型便大功告成。
A貨盧覓雪整妝待發，隨即心急駕車到中環蘇豪一間餐廳會真身盧覓雪，他甫推門進餐廳，真假盧覓雪登時全接觸，金牌真身對贗品全身上下打量，讚不絕口，點中笑穴的盧覓雪更笑彎腰，稍為止笑後劈頭第一句便說：「我哋平時係兄弟，家變姊妹。」
盧覓雪和祥仔無論樣貌和打扮，猶如失散孖女，幾可亂真，不過細心挑剔，穿上低胸裙的盧覓雪，胸前略見事業線，難怪裝了假狗的祥仔手急眼快轉身托胸，他同時又抵死說：「我都要拉低啲。」但盧覓雪似乎真金不怕洪爐火。
誓言打殘Twins
兩「女」應記者要求，背對背拍照，若不是祥仔身形較高頭大馬，他們驟眼看來真像一對連體嬰。問二人可有意趁Twins人氣跌，乘勢孖住上位，祥仔即搞笑說：「係呀，我哋要打殘阿Sa（蔡卓妍）同阿嬌（鍾欣桐）。」
盧覓雪不得不佩服祥仔的模仿能力，她笑說：「我真係唔可以相信自己有一個失散咗嘅姐姐。」祥仔反應甚快說：「咁你屋企有冇懷疑你。」
選中適合對象
祥仔認同模仿成功，最重要選中適合自己的扮嘢對象，他說：「首先一定要揀同自己外形似，然後留意對方嘅小動作同神態，再將佢放大10倍，誇張啲自然會令觀眾有聯想。」祥仔這次挑戰盧覓雪，扮起來揮灑自如，他說：「咁我哋都熟，平時偶然又會約食飯，開吓大食會。」
李思捷最想扮MJ
李思捷的扮嘢能力不下於王祖藍，他過往在節目內先後玩盡不少經典人物，他深信自己還有很大的進步空間，並希望有機會可以挑戰高難度，就是在鏡頭前扮已故國際巨星米高積遜（MichaelJackson），李思捷說：「我知好多人都扮過MJ，但大家多數只着重扮佢舞步嘅部份，但我最想突破，學埋佢嘅唱腔，一新觀眾耳目。」
學秋官瞪眼
李思捷早前上身扮鄭少秋、成龍、郭富城和杜麗莎等，全部栩栩如生，跟真人版神似，當然每次上身前，思捷都勤力做功課，他說早前獲悉要扮鄭少秋，竟在電視城跟正版秋官相遇，他說：「我同秋官講過幾日會扮佢，佢一聽到就叮囑我要扮得佢型啲。」
秋官始終是扮嘢始祖，思捷不能有辱前輩，他說：「我扮佢嘅時候，先掌握佢平時幕前嘅小動作，我留意到秋官好多時會做出瞪眼小動作，於是索性將佢誇大十倍做出嚟。」結果當然令觀眾睇到拍爛手掌。
王祖藍天生冇腳毛
橫看豎看王祖藍都稱不上俊男，既然掹唔到車邊，他索性反傳統在鏡頭前玩變性，卻成功為自己闖出索女新境界。祖藍近日在《荃加福祿壽》中男扮女玩盡娛圈索女，不但未有醜化，反而被讚索爆螢幕。
陳潔靈變葉麗儀
扮女人扮上癮的祖藍，每次造型都一絲不苟，拍檔李思捷也忍不住大爆祖藍玉腿的秘密：「佢條腿真係比女仔仲女仔，唔單止夠瘦，着高踭鞋又自如，最重要係一條腳毛都冇。」祖藍公開變身索女三招，他說：「做女人要識唔食嘢、化妝同谷胸收腰。」祖藍美艷背後已出現後遺症，他說：「呢排成日戴bra同着高踭鞋扮女人，肩頸同脊骨已經不勝負荷赤赤痛，我已經開始做物理治療。」
今晚播出的一集，祖藍暫時收起胸前「事業線」，改以密實造型變身前輩女歌手「MissFrancis」，與「南極邦」李思捷齊齊爆爛gag向《超級巨聲》的參賽者傳授心得。其實導演最初意屬祖藍扮陳潔靈，料不到出來效果激似葉麗儀，索性將錯就錯，他自嘲：「今次係荷包蛋變炒蛋。」
「南極邦」晒金句
擅長執生的祖藍立即換MissFrancis腔訓示參賽者，他看到手持名牌的參賽者字迹似鬼畫符，MissFrancis即啜核說：「你爹哋係咪道士，識畫符。」南極邦則學晒藍奕邦的雙語金句，他向面前的參賽者說：「Ifno氣nosing,youarenotasinger,youaremylover。」眾人忍俊不禁，無從招架。
