周啟生下周舉行爵士音樂會，是否曲高和寡屬未知之數，但評當今樂壇抄歌風潮，他一錘定音：「咎由自取，仲要死頂話唔係，無恥！」論新晉天后謝安琪走音，「佢喉嚨椗唱歌嘅。」聽方力申鄧麗欣兩位80後歌手唱現場，不如借尿遁，還豪情地說：「我肺炎唱歌都好過佢。」這位60後句句到肉，拍得住立法會外的那群80後。
撰文：丁寧
近年香港樂壇千瘡百孔，偶像如鄧麗欣（Stephy）、傅穎甚至謝安琪都因唱歌走音屢成笑柄，入行逾30年的音樂人兼歌手周啟生，日前提及一眾走音歌手時，嬉笑怒罵一針見血，他直指「謝安琪喉嚨椗唱歌嘅。」他稱捧偶像是健康的，但走紅後理應做好音樂回饋樂壇，「成班人夾計捧到個有潛質、食到娛樂圈飯、應酬叻嘅藝人係好，但上咗位嘅就保護自己，唔會貢獻樂壇，唔成功嘅更加唔穩陣，香港咪永遠唔夠嘢聽囉。」
Cookies美貌勝歌聲
周啟生還笑說：「我睇啲音樂頒獎禮，笑死呀，搵一個唔走音都冇。有次我做評判，方力申、Stephy，我屙尿，走呀，我頂唔順！對唔住，我畀你打一身，搵條繩掛天光，我肺炎唱歌都好過佢，都唔係唱嘅何必勉強。唔適宜唱歌嘅，應該保留番喺做電視、整容、隆胸，例如嗰幾個整容女仔Freeze，佢哋靚o架。好打嘅去打，唱得嘅去唱，唔好個個變全能藝人，全部拍電影拍劇唱歌，尤其Cookies，我好鍾意佢哋嘅美貌，但唔好唱歌，為聽眾設想啦。」
走音、毒禍、淫照，都是令樂壇沉淪的因素，周啟生也不屑，「有啲人根本唔檢點，又吸毒又飲酒又食煙，家嗰班所謂新，我哋就古板過期，原來吸毒係新穎，我新潮過你萬倍呀o靚仔！全香港第一個掛住耳環上電視係我，第一個着背心上電視又係我。唔好墮落就係新潮，我咁大個人一粒丸仔都未食過，玩呀你估，黐線！」
有功必表有抄必抦
時下樂壇抄歌成風，周啟生揚言是人才不足，唱片公司圍威喂玩小圈子益自己友所致，他嘆道：「嗰時某人抄歌，公司幫佢畀錢啃晒，喺香港區當係佢作就算，成班人夾埋，電台又唔提，但我哋撞兩個音就要俾人砌。應該大家一齊攞個真心出嚟，有功必表，有抄必『小』，樂壇先會有經典歌。」
抄風不可長，周啟生說：「抄係唔啱，啲人又可唔可以抄得精采啲呢？我都抄好多，但唔似o架，因為我借隻歌嘅味道，唔係攞隻歌嘅melody。總括嚟講，啲人抄歌俾人踢，咎由自取，仲要死頂話唔係，無恥！有啲人講到自己成個寶寶咁，你係寶寶我就小露寶啦！呢個世界假的真不了，真的假不了。我哋作為前輩要摒棄門戶之見，唔鍾意我唔緊要，我繼續向前，希望做到更多嘅嘢。」
擲20萬圓爵士夢
樂壇大氣候吹商業風，周啟生卻向虎山行，下周三（12日）於中環大會堂舉行爵士音樂會，嘉賓欠奉，頂多一套靚老西踩台，純粹以歌會友，他說：「好多人覺得爵士音樂難明白，但今次我會用簡易從容嘅方式表達，揀流行曲變jazz。」
慳住使封蝕本門
周啟生認為仍有附庸風雅之士懂得欣賞爵士樂，「我唔係話自己叻，仲有好多嘢要學，但要夾香港其他人，好多人唔敢玩，搵啲pop嘅crossover又驚驚哋唔敢嚟，我唔理邊個最出名幾巴閉，天王都好啦，jazz係culture，你唔識會好尷尬，我搵咗兩三個都推咗，不如算啦，擺個大歌星又幫到乜？唔使下下要嘉賓嘅。」他對票房也定過抬油，「爵士綵排時間少，用番大會堂音響，淨係租樂器，一定賺到錢，製作費20萬之內，就算和或者蝕少少，都起碼做咗樣我鍾意嘅嘢吖。」
