感情空白的張文慈，卻不想家中愛犬波波孤單，早前特別多挑選一隻狗女為波波作伴，小狗女熱情得不但逢人咀，就算與波波屬不同品種，兩狗同居僅一個月已相處融洽，異性相吸下，波波整天不停與狗B女嘴對嘴親熱，睇到厭的張文慈笑言開始眼寃。
自嘲是敗犬一族的張文慈（Pinky），其實並不孤寂，因為家中最近添了新成員，牠是剛5個月大的貴婦狗女「妹妹」，由於是家中老么，甚得「媽咪」Pinky寵愛，就連平日是家中小霸王的松鼠狗「波波」都要借歪。
妹妹逢人咀
家中雖然多了妹妹，但波波沒有呷醋，還十分照顧妹妹，但由於妹妹的體形較嬌小，Pinky眼見波波太熱情，經常用肥胖身體挨着妹妹，她怕會令妹妹受傷，所以嚴禁牠們有過份親熱舉動，有時甚至要把妹妹困在籠中跟波波分隔，Pinky日前說：「不過波波好寃氣，佢會行埋籠邊同妹妹錫錫，鬼咁癡纏。」
Pinky為了讓妹妹可以多運動，快高長大，每天會放她出籠自由活動三次，波波就最雀躍。僅5個月大的妹妹十分嬌嗲，熱情如親善大使，更幾乎逢人咀，拍照當天Pinky只要稍為抱妹妹湊近臉孔，牠立即熱情伸脷送吻，冧爆Pinky。
波波怕陌生
愛清潔的Pinky擔心街上細菌多，平時甚少帶兩頭愛犬出街，令一歲多的波波比較怕陌生，拍照當天在狗公園碰到別的狗隻，波波竟嚇到走開，Pinky尷尬說：「我諗以後要幫波波擴闊生活圈子，我會盡量約啲有狗嘅朋友聚會，帶埋波波出嚟玩，等佢唔好咁細膽。」
天生一副上鏡樣的波波，最搞笑是當由主人拖着散步時，牠卻坐在地上，任Pinky怎拖也不肯步行，她說：「佢喺屋企好活潑，一出到街就好怕醜，佢點都唔肯行，佢嘅patpat黐實地下，我真係冇佢符。」Pinky希望活潑的妹妹的出現，可以感染波波的性格變得較開朗，Pinky這個媽咪，認真用心良苦。
採訪：比華利 攝影：林德雄
髮型、化妝：KathyL.（CiaoBella）
寶貝狗絕育變大細路
不少愛狗主人都會替寵物及早做妥絕育手術，免除後顧之憂，張文慈（Pinky）也不例外，她於松鼠狗波波6個月大時便心急安排牠進行絕育手術，Pinky說：「不過近日我同有養狗朋友分享心得，佢哋話其實狗仔唔適宜太細進行絕育手術，如果佢哋心智未成熟就做咗絕育手術，或者會將佢哋心智停留喺同一個年紀，行為永遠會長唔大，有時我都覺得波波好細路仔，所以我家都唔知係咪呢個原因。」
怕妹妹好痛
Pinky吸取了這個經驗，決定5個月大貴婦狗女要長大一點才做絕育手術，她說：「妹妹家只係得5個月大，要佢咁細個做手術，我怕佢好痛，所以我會等佢嚟一次月經先做手術。」