民建聯可能開咪成癮，竟然向泛民陣地「青台」埋手。網上電台「青台」台長林子健噚日透露，陳克勤今年初靜靜雞約該台講波主持朱Sir食飯，提議每集贊助幾千蚊做製作費、車馬費，條件係畀民建聯成員一齊做主持；節目一半講時事，一半講波，即係想玩軟銷。林子健話好彩朱Sir冇「見錢開眼」，否則「青台」赤化咗嘞。
民建聯食檸檬，再開新盤口，話可以搞一個新網台，撬朱Sir同其他主持一齊過檔，但都無功而回。林子健話估唔到民建聯無孔不入，「好卑鄙，夠膽老虎頭釘虱乸，好彩啲主持夠硬淨。」青台本周六中午至夜晚，與學聯合辦全港唯一五區補選直播論壇，現場有300座位，網民可即時提問質詢候選人，白姐姐拒絕赴會。詳情可睇青台網頁 http://www.hkgreenradio.org