記得我求大俠之前講過，今屆世界盃英格蘭另一半（WAGs）嘅大姐大權杖，好可能係由謝拉特太太居倫同埋朗尼嬌妻高蓮競逐；不過，喺睇到體育用品公司「菱形牌」最新推出嘅世界盃便服系列嘅廣告之後，我決定收番呢句話，因為熱刺前鋒高治嘅未婚妻艾比（AbbeyClancy）實在太索喇！
高治未婚妻艾比贏晒
高治喺周三銅頭立大功，替熱刺擊敗曼城取得下屆歐聯席位，而佢嘅模特兒未婚妻艾比亦唔弱，喺「菱形牌」最新推出嘅世盃便服系列中擔大旗，睇身高5呎9吋嘅艾比淨係着住英格蘭大軍嘅白色poloshirt，露出42吋長腿，加上誘人金髮，一個字：正！如果要雞蛋裏挑骨頭，我求大俠就梗係嫌件poloshirt太鬆身，show唔到艾比32C-24-35嘅美妙身段囉。
7國靚女靚太來頭勁
唔講唔知，「菱形牌」呢個新廣告，相當有心思，話呢個世界有7大奇蹟，足球歷來亦有7隊世界冠軍，所以就喺呢7支世界冠軍入面，搵咗代表嘅WAGs嚟做便服糸列嘅模特兒，所以，艾比有幸代替英格蘭，都咪話唔巴閉。
除艾比之外，仲有烏拉圭射手科蘭嘅名模老婆娜拉（ZairaNara）、意大利前鋒基拿甸奴嘅女朋友愛麗絲（AliceBregoli）、法國後衞基捷基治嘅太太莎蓮（CharleneSuric）、阿根廷新星前鋒柏保路莫治嘅19歲o靚模女友盧莉（LuliFernandez）、德國馬素贊臣嘅靚老婆茱莉亞（JuliaGodicke），同埋巴西「大哨」前女友、家係門將施薩索拉斯另一半嘅蘇珊娜（SusanaWerner）；完全滿足到各類型「睇肉家」嘅需要。
可能係有競爭關係，各支國家隊嘅WAGs都唔想衰，大家都施展渾身解數，令影出嚟嘅相片更有睇頭，真係唔買都要埋嚟吓先得！