用過Smartphone都知呢條係不歸路，特別係iPhone，只會越用越上癮。中國移動（941）肩負國產3G研發重任，3G上客終嘗甜頭，3月增加341萬戶，增速明顯加快。中國聯通（762）隨即大打減價戰，據講將公佈入場費低至36元（人民幣．下同），又打算為iPhone減價1000元，月費計劃亦減至96元，仲平過香港。
目前內地移動互聯網用戶1.85億，仍有較多人用上一代WAP嘅2G技術，簡單下載歌仔睇新聞等。喺電訊運營商大手增加3G覆蓋率時，唔好以為2G會被淘汰，中國地大物博，要將3G真正全國普及好似香港接收得咁好，起碼要多幾年。
未來3G同2G應該是並行發展，將唔需要佔用太多網絡空間嘅普通話音傳輸，自動回流至2G，數據傳輸就行3G，咁樣就唔使成日塞車。由於一方面要興建新網絡，另方面要優化同維修現有基建，提供相關技術嘅設備股自然維持高增長。
京信質優利錢高
一講電訊設備股，投資者經常將手機代工、機身、屏幕、天線、網絡等混為一談，首選梗係具備入行門檻較高嘅專門技術，同有穩定客源嘅股份。專營網絡基建同升級嘅就有京信通信（2342）同星辰通信（1155），兩者主要客戶都係內地幾大電訊運營商，不過京信就有海外業務，佔去年收入14.5%，公司指未來將增至20%；大客係中移動（41.9%）、聯通（27.5%）同中電信（8.1%）。
星辰業務較側重內地，偏遠地區更係佢強項。至於規模亦以京信佔優，ROE（25%）及毛利率（38%）都領先星辰嘅15.7%同28.4%。
利錢高除咗因為技術水平較高，京信去年為現有2G網絡升級同維護嘅生意多咗37.7%至14億港元，總之室內外有網絡嘅地方，都有佢嘅足迹。呢門生意其實幾「屈機」，電訊商開檔前要靠佢嘅技術，整好後維修保養亦要靠佢。京信嘅賣點唔只係次次有紅股派，生意長做長有更吸引。
胡孟青