九龍西候選人白姐姐支持度咬緊毓民，佢愛人謝偉俊噚日喺議事堂幫忙曲線拉票，不點名指有人不斷吹噓因為掟蕉而令政府增加生果金，係本世紀最大政治詐騙案，要求煲呔講清楚當日係咪因為一蕉而轉軚。
煲呔精甩尾，豈會唔知道謝偉俊目的何在？但為打擊毓民，一於順水推舟，指當日因為兩大黨民建聯同民主黨都批評佢唔加生果金，加上聽到民意所以改政策，擺明唔想畀毓民攞彩。
煲呔同謝偉俊一唱一和，職工盟李卓人直斥係同白姐姐曲線助選，大嘆：「真係乜都佢玩晒啦！」
謝偉俊唔單止出口術，噚日仲身穿寫有「支持白韻琴一票」嘅青綠色助選背心出席立法會，佢甫入議事堂就將件衫裏外反轉着，避免被人抽秤，萬一要計選舉經費就大鑊。