淡風真係凜冽，今個5月份港股連插多日，昨日仲一度跌穿2萬點，最低見過19888點，但2萬點樓下始終引到買盤入場，所以大市低位有承接，2萬點失而復得，收報20133點，大市成交增至815億元。
昨日港股跌穿2萬點之際，股場悲觀情緒真係幾濃烈，偏偏氣氛最悲之時，就係撈底短炒好機會，如果唔貪，炒「即日鮮」應該有甜頭。
好似創維數碼（751）昨失守7元之後，股價最低見過6.46元，大市跌勢扭轉，創維即現反彈，收報6.7元，如果撈到底，當然有利可圖。其實，創維自4月以來一直跌多過升，短炒博反彈有一定水位，如果能升返10日線水平（現處7.26元）以上，可以上試8元阻力。但由於市況十分波動，若然現價入市而股價受制10日線阻力，咁無論輸贏都要睇位計數。
創維3月電視機銷售量54.5萬部，按年升14%，傳統CRT銷量雖下跌，但高毛利平板電視銷量升15%，拉均來計算對辦。
方星俠