毓民喺旺角間牛肉麪店因不堪貴租，5月4日晚招呼完幾十個出席完造勢大會嘅兄弟後光榮結業，九龍城店照常營業。
陳偉業稱，旺角牛肉麪店原來係社民連誕生地，好比孫中山搞革命嘅興中會，形同中共起家根據地瑞金，日後社民連上台執政，花園街3號地舖應該改為革命博物館，紀念抗爭歲月。陳偉業稱05年同長毛、陶君行想搵埋毓民組黨，所以頻頻幫襯牛肉麪，食足半年先成功說服毓民起旗創立社民連，但更難嘅事在後頭，要過埋「太后」黃太一關先成事。
陶君行透露，幾個人喺店內嗌過都唔知幾多場交，「次次長毛都係拍枱起身走人，之後就call我，叫我幫佢畀錢。」毓民話老毛說革命不是請客食飯，家陣搞革命唔使請食飯，卻要有間麪店先聚到班兄弟。