警隊今日公佈警司紮職名單，據八方收風，今次升職人數多達44人，係歷年最多。舊年有近40人升職，點解今年又有咁多人升職呢？有警隊中人話，現時警司編制人數264人，但去年開始同隨後嘅三年，都係警司退休高峯期，所以要升多幾個去補充囉，估計明年仲會升多60幾人㖭。
被笑言臨別送大禮
今次升級名單中，包括警隊「一哥」鄧竟成嘅副官，即係處長私人助理郭嘉銓。郭Sir係中大聯合98年政政系畢業生，本身係高級督察，家陣做署理總督察職位，做現時職位僅兩年年資，咁快跳級紮職，有夥計笑言可能因為「一哥」倒數退休，臨別在即送份大禮畀下屬。
另外一位升職嘅係督察協會副主席劉達強，現年52歲嘅劉達強紅褲子出身，加入警隊33年，做CID做咗25年。佢唔只係警隊反黑專家、談判專家，過去破過唔少大案，包括轟動一時綁樹黨同金鐘地鐵縱火案，升職實至名歸。