組成十年的農夫於下月舉行首次紅館演唱會，他們由只容納幾十人的場地，至坐滿幾千人的場館都唱過，今次踩上觀眾席逾萬的紅館，C君（鄭詩君）及陸永齊齊說：「今次我哋唔再係做人哋嘅嘉賓，我哋先係主角。」更表示不會讓老闆陳冠希（Edison）上台獻唱，以免被他搶鏡頭。
農夫下月16日正式踏入紅館，舉行「DownToEarth2010演唱會」，原來C君及陸永從來沒有想過要在紅館開騷，他們說：「真係諗都冇諗過，今次開得成呢個演唱會係公司叫我哋開，咁有人叫我哋梗係開啦。」場地大小對於農夫來說不是最大的顧慮，他們覺得觀眾的反應才是最重要。
最怕觀眾唔投入
C君續說：「30人嘅場我哋唱過，幾百人、幾千人嘅場又做過，去邊度做我哋都係咁唱，就算你畀我去個3萬人嘅場，但係大部份人都唔投入去聽我哋唱都係冇意思。」
其實農夫對於紅館這個場地一點也不陌生，陸永表示之前曾擔任別人的嘉賓差不多十次，他笑說：「今次終於到自己主場啦，次次都係作客，我哋都諗緊請邊個做嘉賓，四小強（王菀之、張敬軒、張繼聰和方大同）係我哋好想請嘅，因為大家同期，不過又好多人忽略咗農夫喺四小強入面。」
棟篤笑玩殘老友
問到農夫會否邀請老闆陳冠希上台獻唱？C君說：「唔好啦啩，我怕大家係咁叫佢encore呀，佢一定會嚟主持大局，大家如果入嚟係想見Edison，就唔好望住個台啦，望控制台啦。」
此外，農夫於演唱會上會有45分鐘的棟篤笑環節，更揚言會將圈中人擺上枱，他們說：「總之得罪得嘅人我哋都唔怕得罪，因為我哋都成日得罪人，做得我哋好朋友嘅一定走唔甩，俾我哋拎出嚟講。」最後農夫表示今次演唱會是組成十年的心血結晶，從海報、造型、舞台及服裝等都是由他們構思的。
採訪：李珮洳
攝影：陳慧安
化妝：Manyee
髮型：Renton（IlColpo）
服裝提供：5cm
