曾經晚晚陪住觀眾、帶畀大家無限歡樂嘅《歡樂今宵》（EYT），係1967年11月啟播嘅鎮台長壽節目，雖然無綫冇再做EYT，但一班台前幕後不時有聚會，成個大家庭咁。聽聞佢哋最近仲成立咗個「EYT好友會」，聯絡感情之餘，仲用好友會名義做善事。
會員已過百
馮仁昭聽聞班EYT老臣子已經推舉咗吳雨做會長、何麗全同鄧英敏做副會長，目前正向政府申請做非牟利機構。會員方面就有吳君如、陳玉蓮、盧海鵬、林建明、夏雨、鄭少秋同盧大偉等。又會搵番以前無綫總經理羅仲炳同何定鈞等人擔任顧問。
噚日馮仁昭打電話向鄧英敏求證，佢話：「我哋搞呢個好友會係希望大家有個機會聚吓，一齊參與吓社會公益，好似之前演藝界幫青海玉樹籌款嘅大滙演，我哋成班EYT同事都有參與，到目前為止，會員已經大約有百幾人。」