楊愛瑾（Miki）及董敏莉（Monie）近日忙於綵排5月舉行的舞台劇，首次演出舞台劇的Miki扮演離婚婦人，心情十分緊張，經常擔心出錯及忘記台詞，幸好有經驗豐富的Monie教路。
有不少拍戲經驗的楊愛瑾近日於工作上有新挑戰，與同公司的董敏莉一同演出舞台劇《親愛的．維多利亞》。Miki飾演一名曾到外國讀書的港女，於外地結婚再回流返港，本來美好的婚姻生活卻出現問題，發現老公經常收到其他女性的曖昧短訊，最後只好忍痛離婚。
要揣摩一個離婚婦人的角色，Miki覺得有點難度，她說：「始終都冇結過婚，惟有將之前分手嘅感覺投射喺角色上，同埋第一次做舞台劇真係好緊張，成日都好怕走錯位同埋唔記得台詞，如果上到台先唔記得就好大件事，好彩Monie成日都會提點我。」問到Miki現實中會否容忍丈夫不忠？她說：「睇吓有冇BB啦，如果老公只係同其他女人有啲曖昧嘅SMS，可能會啞忍，因為做父母有責任畀一個完整嘅家庭畀小朋友。但係畀我知道真係做咗背叛我嘅行為，一定會離婚。」
Monie拒做港女
至於在劇中飾演一名典型港女的Monie則說：「我頂唔順啲女仔好扭擰，乜都要男朋友就晒佢，我個人比較男仔頭，連我啲同事都話我似男人，所以我絕對冇公主病。」劇情需要Monie主動追求男主角，但她強調現實中一定不會採取主動。
撰文：李珮洳