商台風雨飄搖之際，噚日有貴人到訪。有商台員工午膳時間喺公司見到正保釋嘅陳志雲，同近期人氣爆燈嘅商台主持潘小濤握手寒暄，目擊者形容兩人表現老友，志雲唔似扮熟。小濤笑笑口問陳志雲係咪嚟開咪，陳志雲笑而不語，反贈小濤：「唔好咁勞氣喇！」真係高手過招，點到即止。
直入總經理間房密斟
據講噚日陳志雲單拖到商台，直入總經理陳靜嫻間房閂埋門密斟，傾咗起碼一、兩粒鐘。商台公關同八方講，雙陳係老朋友，噚日純粹開房傾閒偈，又透露陳志雲上星期已到過商台一次，都係傾閒偈。至於係咪會合作，佢話到呢一刻都冇聽過；如果陳總開咪，一定第一時間公告天下。
陳靜嫻係商台副主席俞琤愛將，佢同陳志雲密密見面真係「傾閒偈」咁簡單？志雲就話冇工返好得閒啫，陳靜嫻辦公時間又咁得閒應酬閒人？須知道陳志雲曾在商台主持節目，係俞琤得力助手，當年曾力阻港台引入商業廣告，保住商台廣告大肥肉，之後陳志雲跳槽無綫，據講俞琤都有份穿針引線，可見兩人交情匪淺，若然志雲食回頭草，八方相信冇人夠膽講冇可能。
總經理有時間傾閒偈，引狼入室嘅一台台長黃永回應全城聲討忙得多，佢噚日繼續死撐，主持《在晴朗的一天出發》時以林彬做擋箭牌，話自己好尊重林彬，相信聽眾唔希望佢同其他主持人，好似林彬咁受到「暴力對待」。
「維園阿哥」馬草泥噚日向廣管局遞交逾千名市民簽名投訴信，要求當局徹查民建聯賣政治廣告事件，他又指明日凌晨2至6時，網上電台「香港人網」會製作《一切從錢銀出發》節目，邀請各政黨成員做客席主持落區，擺明車馬與《十八仝人愛落區》打對台，「節目真係落區做探訪，絕對唔係為錢而畀議員做騷。」
廣管局接逾八百投訴
廣管局截至昨日收到800多宗不滿商台播放贊助節目投訴，另有13宗投訴卿姐個報時廣告，投訴會在合理時間內處理。特首曾蔭權噚日出席答問大會時，表明無意檢討現行禁止賣政治廣告嘅條例及守則。
mailto:[email protected]