舊年電腦節鬧雙胞，強強對碰，結果兩個電腦節內嘅產品起勢劈價，益晒大批電腦迷拖住篋瘋狂掃貨，出現雙贏結果。話咁快今年電腦節又快到，電腦商會搞嘅「電腦通訊節」喺8月20至23號登場，深水埗腦場亦諗住再嚟一次硬撼，準備同期搞「腦場電腦節」。
電腦商會創會會長張耀成噚日話，今年電腦節會用潮貨吸客，「電腦節唔會淨係得平嘢執o架，最潮嘅新貨我哋一樣有得賣。」家陣乜都話要3D立體，連o靚模出本寫真集都加3D效果。電腦商亦會推出大批3D電腦產品。想執平貨一樣有機會，張耀成話今年都會有一、兩折嘅平貨等大家血拼。
搵埋內地城市搞展區
除咗用潮貨、特價貨吸客，今年電腦節繼續搞ITImageGirl美少女選舉，繼續搵班靚女嚟吸客，到時入場嘅宅男買完嘢仲可以捧場睇吓一班美少女。商會今年仲大賣神州概念，搵埋廣州、深圳、澳門、中山、西安同成都齊齊搞展區。呢度小妹真係要提醒一眾腦迷：小心咪買老翻呀。
商會來勢洶洶，腦場又有乜對策？新高登電腦廣場業主委員會主席呂健忠同小妹話，深水埗腦場會比電腦節早三日出招，喺8月17號開始，一連九日搞夏日腦場電腦節，主打賣機頂盒同大賣嘅LCD芒、LED芒，價錢低至六五折起。不過每日只係限賣五種劈價貨，限量100件；亦都會仿效對手同場加演腦場小姐選舉，誓要同電腦節硬撼。各位腦迷可能又要做一次篋神啦。
電郵：mailto:[email protected]