北京分化泛民、打壓5.16公投嘅河蟹世博考察團星期六出發，立法會秘書處噚日發出三日兩夜行程表，八方睇過，行程安排都十分細心，提醒議員着平底鞋出發，仲有溫馨提示，高鐵冇行李寄存服務，議員隨身只可攜帶重量不超過20公斤嘅細細件行李。
高達話想同上海人搭訕
白鴿黨有五人隨團去上海，除李華明外通通係「無證人士」，高達噚日睇完行程表，即指行程太密，事關佢呢啲「無證人士」十幾廿年冇北上，最想把握機會喺上海自由行，親眼睇睇國情，並唔係去參觀世博啲乜館物館。
根據行程，星期日下晝四點至五點有一小時畀議員喺世博園區內購買紀念品，高達話考察團唔係購物豬仔團，所以呢部份行程唔使預佢。點知另一議員、「經濟動力」林健鋒聽到高達咁講，笑佢「你成日都俾人管o架啦，返屋企俾老婆管。」高達反駁：「我老婆都唔理我，我好自由嘅。」
高達透露已計劃到埗首晚，同黨友李華明去上海最繁盛嘅南京路步行街見識吓，仲想同上海人搭訕了解民情，「因為我上海任何地方都未去過。」一聽到白鴿黨人想自由活動，林健鋒好緊張咁話唔好立亂離團，事關上海市中心一日到黑都好塞車，自由行分分鐘流落街頭返唔到酒店，跟唔上大隊就麻煩。
建制派想睇實白鴿黨有原因，八方聽聞有關方面十分緊張白鴿黨會唔會喺途中加插「特別節目」，譬如話遞信、拉橫額、嗌口號等等，因此近日四出收風，探聽佢哋有乜動靜。焗住綑綁式遊上海嘅高達唔死心，話同上海人大常委副主席食飯時，會向內地官員反映港人爭取民主意願。世博團由立法會主席曾鈺成做團長，民建聯陳克勤爆料，指阿曾有嚴重暈船浪毛病，星期日晚上海市政府邀請夜遊浦江，對阿曾好有挑戰性，相信要啪定暈浪丸先上船。
獨立媒體高鐵資料贈興
立法會考察團出發前夕，獨立媒體送份「手信」《武廣高鐵資料冊》畀議員，提醒議員坐高鐵時留意高鐵嘅效益同對民生影響，向內地官員問清楚高鐵真相，究竟係利民定係害人。
mailto:[email protected]