早兩日講過，希臘債務唔只經濟問題咁簡單，已演變成歐盟各國嘅政治角力，富國覺得為捍衞歐元出錢相助好蝕底，希臘人亦唔願意共度時艱幫政府減赤。結果真係開口中，希臘公務員發起48小時罷工，希望事件盡快解決，否則若行動升級令經濟活動癱瘓，加埋冰島火山死灰復燃，再阻航空交通，金融市場真係凶多吉少。
歐洲人辦事向來「嘆慢板」，連穩定金融市場都慢過人。西班牙總理薩帕特羅喺股市跌到一仆一碌後，臨收市前先出嚟澄清話冇向IMF尋求撥款2800億歐元，仲話有關謠言Madness（瘋癲）。
5月似乎唔多吉利，不過惠理基金叫投資者千祈唔好SellInMay，令人擔心嘅係下星期內地公佈通脹數據，黑色星期五加息嘅陰影不能不防。
雖然官方通脹數字仲未超過3%嘅高危警戒線，但每隔一排上去，會發覺衣食住行都貴咗。目前CPI好多重要開支都未被納入計算公式，好似飛升中嘅租金同樓價，可見現今的通脹數字根本反映唔到實況。
買定金油磚頭對冲
呢類居住類開支佔CPI約15%，係第二最多，不過當中有四成來自有價格管制嘅水電燃氣。要了解通脹係咪失控，基本上睇實食物價格就得，因為比重有成32%咁多。豬肉價格已見底回升，連一直限價嘅成品油都喺4月調高咗，睇怕中央要控制全年通脹喺3%內，成功機會越嚟越低。
面對高通脹年代，樓價已先行反映市場對負利率環境嘅預期，不過唔好以為高通脹肯定會推高資產價格，揸股票實冇死。睇番美國70年代，通脹高逾14%，統計指若喺1966至1981年間持有標普500成份股，年回報率6%，但扣咗每年7%通脹後，複合回報率負14%，係歷來最差。反而喺1929至1944年大蕭條期間，複合增長有25%。
所以高通脹絕對係人類天敵，中央高度重視維護社會「河蟹」，加存款準備金率甚至加息都係為經濟好。不過以美國咁樣印銀紙法，通脹失控係遲早嘅事，所以大家嘅投資組合最好都係買啲金銀珠寶、石油同磚頭分散風險兼對冲。
胡孟青