英皇地產近日狂谷新樓盤維壹，昨日安排眾星撐場造勢，早前倒米唔買的蔡卓妍繼續缺席，就算畀面到場的古巨基和張家輝也異口同聲表態沒有入巿打算。基仔更大爆雖受父母催婚恨抱孫，但仍未有結婚或造人計劃，他不擔心年紀大，並表示自己有心有力。
鍾欣桐（阿嬌）、張家輝、古巨基、泳兒、鍾舒漫和黃耀明等英皇藝人，昨日幾乎總動員到尖沙嘴出席英皇地產旗下的樓盤維壹造勢，容祖兒昨日雖冇到，但早前已高調直認入巿支持，而倒米未入巿的蔡卓妍則以在北京工作為理由缺席。昨日到場的藝人更獲英皇珠寶贊助閃耀鑽飾撐場。
阿嬌昨日身上佩戴約130萬鑽飾亮相，非常搶鏡，對於早前被爆購入價值2,700萬的豪宅，她表示買樓可以保值，日後可會趁高賣出？她說：「咁要30個月後收樓先問我，呢個單位係同媽咪聯名。」農夫前日公開指會邀請淫照男女主角陳冠希和阿嬌睇下月紅館處男騷，但阿嬌昨日大派檸檬：「我唔會去，到時我唔喺香港，返咗內地拍劇。」
基仔懶理父母催婚
基仔表示未有計劃入巿買維壹，他解釋：「維壹要買畀唯一嘅人。」至於基仔是否已有心目中人選，他則詐聽不見。是否有待負責管理店舖財政的緋聞助手女友Lorraine來睇樓才決定，基仔立即啞口無言：「不嬲講呢話題，你哋（指記者）都贏，我認輸囉。」
記者笑指古媽媽應想基仔盡快娶妻代替置業，他直認：「父母有催我想抱孫，但我未諗到，自己仲後生。」基仔是否跟緋聞助手女友Lorraine有共識？他避談：「我同家人，同父母仲未有共識，我仲大唔透。」記者取笑基仔不擔心年紀大不利生育，他說：「我有心有力。」
「買樓要量力而為」
家住貝沙灣的張家輝也無意斥逾千萬元入巿，他說：「借咗唔使還咩，畀咗折扣我都冇睇。」家輝希望未來把物業留給囡囡做嫁妝，他說：「我希望自己瓜老襯後可以留番啲樓畀囡囡，但買樓都要量力而為。」談到林建岳女友Monica被發現拖新歡，家輝說：「雜誌嘅嘢冇得證實，我冇乜嘢好講。」
採訪：馬建華
攝影：黃文成