立法會主席曾鈺成話可以辭職唔做主席，投政改方案一票，傳統上立法機關主席政治中立，因此泛民對曾鈺成言論好有意見，日前去信要求曾鈺成解釋有冇違反選舉承諾。
冇得去飯盒會
曾鈺成噚日覆信，表示有興趣同泛民一齊開逢星期五舉行嘅飯盒會，可以捧住飯盒同大家表白自己立場，飯盒會召集人何秀蘭指同曾鈺成食飯冇所謂，但飯盒會有其他非議員泛民黨派人士在場，恐怕曾主席嫌生外，因此反建議喺主席室見面。
曾鈺成言論起風波，泛民提出下星期三在立法會辯論「立法會主席維持政治中立」，題目已交畀主席，至於是否批准辯論，應該由曾鈺成自己決定，抑或由內務委員會主席劉健儀揸主意，據講暫時未有定論，可能要立法會法律顧問花啲時間考究先得。何秀蘭又指，曾鈺成曾承諾主席任內唔會發表引起爭議言論，今次明顯食言，出嚟畀個說法，合情合理。