呢個世界有無窮誘惑，英超球星收入高、名聲響，要「搞搞震」易過借火；好似車路士咁，泰利、艾殊利高爾都衰喺異性醜聞中。不過濁水都有清流，28歲嘅車仔中場祖高爾，就係絕種好丈夫同好爸爸。
祖高爾同老婆卡麗（Carly）喺09年6月結婚後，就好努力造人，今年3月卡麗終於為家庭增添第3位成員，就係叫Ruby嘅囡囡。
英國傳媒喺個幾月後，拍到祖高爾一家三口行街街相；祖高爾抱住B女同鄰居晒命，又到公園曬太陽同野餐。祖高爾仲好細心沿途推BB車，唔使老婆操勞。卡麗接受訪問時，就大讚老公：「唔使比賽嘅日子，佢一練完波就即刻返屋企，陪住我同B女；佢仲緊張過我多多聲，家陣B女一個月大多啲，祖高爾已經諗住送佢去學網球，等囡囡可以健康啲。」
極速收身鎖住老公
其實，未嫁祖高爾之前，卡麗係一個健身教練，今次懷胎十月分娩後，個幾月已經極速收身；咁又係，始終出面咁多誘惑，卡麗保持好身材，都易啲鎖住老公個心啦！祖高爾今季季尾就約滿車路士，球會向佢提出85,000鎊（約96萬港元）周薪嘅新約，不過祖高爾企硬要收10萬鎊；咁又係，家陣奶粉錢唔少，而且曼城對佢虎視眈眈，如果車仔畀唔到呢個價，祖高爾大不了跳槽去曼城！
祖高爾小檔案JoeCole
出生日期：08/11/1981（28歲）
國籍：英國
身高：1米76
位置：中場
現效球會：車路士（英超）
主要榮譽：英超（04/05、05/06）、
英足盃（06/07、08/09）、
英聯盃（04/05、06/07）