「每見是非當表態，偶遇得失莫關心，百年恩怨須臾盡，作個堂堂正正人。」
──中國著名繙譯學者楊憲益
民主派20多年來懷着「打爆機」的盼望，跟阿爺對壘，扭盡六壬、遍體鱗傷，遊行簽名、「典床典蓆」，七七四十九個回合後以為卒之「升呢」，結果道高一尺魔高一丈，腳板行爛還未到「finalround」，地球是圓的，我們仍然在起點。
與其抹着眼淚鼻涕，慨嘆又做「儍仔」，有人選擇背城借一，「挑機」辭職成就公投；有人則堅持以和為貴，穩陣談判才是正道，民主之父與民主黨鞭為此公然開拖，未輸人，先輸陣。實情是，不少泛民中人相信路線之爭只是一時，公投談判其實殊途同歸，公投就是談判的籌碼，「如果投票率低，只會畀到中央同埋特區政府一個好好嘅藉口，繼續拖延民主進程。」
記者：張嘉雯
就咁投個票
其實好卑微o架咋
「唔好將談判同公投當係矛盾，兩樣嘢係互補不足，是但冇一樣都唔得。」職工盟立法會議員李卓人既支持普選聯，也認同公投，希望泛民主派不要因此決裂。
他認為，若泛民主派不團結，成效就會打折扣，「如果大家同聲音、同一行動、同一策略，相信個效果好唔同。家大敵當前，民主派應該更加團結顯示力量，谷夠個投票率。唔好講到公投好似好激，根本一啲都唔激，呢個泰國紅衫軍就真係激。就咁投個票，對香港人嚟講其實好卑微o架啫。」
他用工會運作比喻公投，公投可以引發談判，「我成日兩邊都講，好似我哋搞工會咁，如果我唔罷工，老闆都唔肯同我傾、睬我都儍。調番轉如果我罷咗工之後，老闆話同我傾，唔通我唔談判喇喎？談判談唔掂，你都希望有行動可以撐住，相輔相成。」
你摑我一巴
我咪砌囉
談判需要籌碼，民意就是最大的後盾，「你顯示個民意，先有力量去談判o架嘛。5.16有個清楚民意，支持真普選、廢除功能組別，咁你談判先有力。人哋睇死你都冇料到嘅，咁你談乜判呀？有料到先可以談到嘢返嚟。」
普選聯與「獲授權人士」談呀談，結果唐英年拋出來的方案繼續爛，李卓人認為未來一段時間不再是談判時間，而是顯示實力的時候，「談咗唔掂，我哋行動更加理直氣壯囉。如果你唔想我哋行動嘅話，唔該你畀啲嘢返嚟，等我哋同香港巿民有交代。我覺得俾人摑一巴，唔緊要嘅，我哋都成日俾老闆摑一巴，你摑我一巴，我咪砌囉。」
他相信巿民清楚了解整個行動「唔係選舉咁簡單」，5.16後，7.1也要「玩鋪勁」，「唔好畀政府睇死香港人政治冷漠，睇死香港人唔理政改。政府好興講o架，好多民生問題，民主優先次序好低，咁點解我哋咁多民生問題呢？點解貧富懸殊？點解樓價咁高？點解我哋生活唔到？都係因為冇民主之嘛，我哋唔好畀政府本末倒置、指鹿為馬、顛倒是非嘅講法得逞。」
功能組別
吓吓同打工仔女對着幹
作為工會領袖，他直言功能組別對打工仔是「家仇國恨」，「點解我哋人工咁低？點解咁多年冇最低工資呀？最低工資動議喺立法會俾人否決咗N次，最高工時動議每一次提出都俾人否決，公眾假期同勞工假期睇齊又俾人否決過，我哋提出嘅佢哋都否決晒，佢哋吓吓同打工仔女利益對着幹，因為佢哋維護商界小撮人同大財團利益。」
李卓人提醒巿民，不要以為功能組別真的「有功能」，「佢哋入去（立法會）唔係貢獻專業，係維護自己界別嘅利益，李國寶（金融界立法會議員）雷曼事件做過啲乜呀？畀過乜專業意見你呀？唯一做過就係叫班巿民唔好聽銀行呃囉，但係銀行就係呃佢哋嗰啲（雷曼苦主）吖嘛，佢就係銀行利益吖嘛，所以有乜專業啫？我哋唔係反對專業貢獻立法會，我哋反對嘅係專業小圈子利益，凌駕公眾利益。」
公投動員群眾
係好好嘅出路
去年12月，民主黨會員大會上，有網民跪求該黨支持公投，結果大會投票大比數否決參與公投，民主黨收花牌、收衣紙，被叮囑「安心上路」。屬於黨內改革派的范國威認為，當時黨內外支持及反對公投的聲音「唔多唔少去到意氣之爭」，「大家為咗證明自己路線正確，出現咗好情緒化嘅言語，其實呢個係判斷嘅問題多啲，唔涉及政治道德上對錯。」
身處談判派陣營，范國威及其新界東的黨友卻一直默默支持公投，做了大堆橫額，又公然辦「複製十個長毛」活動，為公投造勢，當中涉及謹慎的評估。
他認為唐英年的修訂方案，較05年的政改方案更爛，整個民主派是時候要思考民主運動應該如何走下去，「我覺得好難再發動幾十萬人上街，冇辦法家呢一刻發動大規模遊行、請願同示威行動，但係透過辭職進行補選，只要有以前補選投票率嘅一半，都有二、三十萬人投票。如果變相公投可以動員群眾，呢一個係好好嘅出路。」
選民問我
點解同長毛合流
他笑言，也有選民不明白他的決定，「佢哋以前覺得范國威着住西裝斯斯文文，點解會同一個佢哋覺得較為激進、或者粗獷啲嘅長毛走埋一齊呢？我自己嗰區係較為中產嘅區，社民連較為代表草根聲音，點解會合流呢？我會同佢哋解釋，香港政制問題跨階級、跨政黨，涉及整體民主運動，佢哋都會慢慢明白。」
「有啲巿民唔容易接受呢樣嘢，唔鍾意人講粗口、掟蕉，不過香港人其實好有智慧，會明白係選議題、唔係選人。我亦會同佢哋講，公投係國際常有，外國成日發生，差不多每隔兩三個月就有一次，醫療改革、政制改革，甚至教育政策輕微改動，係咪應該體罰兒童都會公投，佢哋慢慢會接受。」
范國威說，過去幾個月來，雖然民主黨內沒明言支持公投，但實際策略有所調整，也有民主黨的支持者私下捐款支持公投，「之前只可以個人身份支持，家出咗個通告，除咗個人身份，仲可以公職身份支持。我哋由最初唔能夠公開呼籲，到家可以借出區議員，甚至立法會議員嘅街板，全力支持公投，係好大轉變。」
唔係違法
點解唔去試一試
他解釋，遊行、請願、示威，過往一直有做，以後也不會放棄，因為依賴建制不足以令政府釋放更多民主空間，必須結合民間力量，五區公投正好將民主運動帶入新階段，「又唔係違法，唔係激進，點解唔去試一試？條條大路通羅馬，談判同公投唔係互相排斥，都應該去試，公投去到呢度冇得返轉頭，如果投票率低，只會畀到中央同埋特區政府一個好好嘅藉口，繼續拖延民主進程。」
他希望民主運動可以前進，而民主黨作為民主派一員，應審慎重估形勢，再思考在餘下日子是否加大力度，呼籲巿民參與公投。