老友財務L於五月一日退休，四月三十日發電郵畀各界老友，表達感想如下：「無數失敗，少許成就，都在飛快的時光中溜走了。當我在沉醉的夢中醒覺時，已站在人生另外一個起步點，向下一個夢出發。」
財務L平時多講銀行、財技、樓市、股市，點知佢離開工作崗位時，竟然宣佈向下一個夢出發，左丁山諗都諗唔到。去邊處發夢呢？財務L做過跨國大銀行、本地銀行，最近十四年在東涌做超級CFO，佢離開後，一人之職可能由三個人接棒，可見佢平時之能力過人。下一站發夢地點會係灣仔，賓架W今年榮休，已在灣仔租定寫字樓，與財務L分享，兩人鍾意做時就做，唔鍾意時就會一齊去打波或旅行，如斯退休生活，令人羨慕。以佢兩位之財金界經驗，乜嘢銀團貸款、債券、IPO、收購合併及債務重組嘅個案未見過？企業機構搵佢哋做顧問，遠勝於搵三十五歲嘅ibanker教路。
人人有一個夢想，退休後尋找第二春，保持腦筋靈活，應是養生之道。經紀K今年初退休離開和記大廈，亦在灣仔開工，向中貿林租了一個單位，自己搞自己嘢。問經紀K：「點解唔夾埋賓架W、財務L一齊呀？」經紀K話：「佢哋可能真係做嘢o架，會有好多人搵佢哋，而我就只係想一個人玩吓投資，隨時唔返工或者中午飲完茶就打道回府，無謂有拍拿啦！」不過佢哋三位嘅辦公室只係相隔兩條馬路，以後在灣仔隨時可以碰頭。
三人多年來各有義務工作，以後可以做多啲，例如經紀K係虔誠教徒，財務L每年年尾掏腰包及向老友捐錢，招待基層長者吃飯，賓架W就不停為推動歌劇盡力，呢次又買咗唔少門票，送畀老友去聽歌劇。呢套係五幕歌劇「曼儂」（Manon），由香港歌劇院（OperaHongKong）及法國駐香港澳門領事館呈獻，莫華倫監製，係法國作曲家馬斯奈JulesMassenet作品，法國女高音NathalieManfrino，男高音FlorianLaconi等等演出，五月六日及八日在文化中心劇院上演，左丁山屬於法語文盲，既然收到賓架W贈券，一於捧場！歌劇係少數人嘅精緻文化，賓架W肯大力支持，文盲也感動！