世衞總幹事陳馮富珍上個月訪問北韓四日，事後大讚北韓醫療體系「會受到大多數發展中國家羨慕」。
被質疑自甘被愚弄
雞珍係01年以來，第二位訪問北韓嘅世衞總幹事。佢參觀咗城市同鄉村醫院，形容北韓衞生體系相當完備，不存在許多發展中國家須面對嘅缺少醫生同護士等問題；喺疫苗接種方面成績更加突出，接種率超過九成，聽到朝鮮政府官員話，已將降低青少年同孕婦營養不良比例列為工作重點，令佢感到好欣慰。
世衞一姐高度評價北韓，《華爾街日報》唱反調，指雞珍言論超乎現實，因為雞珍參加嘅「旅行團」，睇到嘅嘢同好多來自北韓嘅人差好遠，好多人都知北韓陷入饑荒，就連世衞專家都指北韓醫院情況駭人，因為連自來水同電力供應都有問題。
《華日》質疑雞珍訪問北韓時隻眼開隻眼閉，或者係自甘被愚弄，否則唔會擦鞋成咁，不過世衞都曾讚揚過大陸嘅「赤腳醫生」，雞珍對待呢個極權國家，其實有先例可援。