李明逵率領校友網球隊回到新亞，參加一年一度嘅校友vs教職員嘅網球賽，結果一如所料，大敗而回，今年輸得特別慘烈，一比八，唔怪得前一哥話：「睇完賽果，唔想飲zerocoke。」冇法子啦，教職員隊伍中，有教練級好手助陣，反觀校友隊垂垂老矣，點打？左丁山建議搵一啲八十後校友加入隊伍，點知一位體育老師話：「未必得喎，八十後，九十後學生鍾意足球、籃球，網球好手比較少。」咁就冇計，明年照輸可也。
適逢新亞校董會秘書文直良博士於暑假退休，返回雪梨與太太團聚，李明逵特別向佢致送一份特殊禮物，以作紀念。文博士係網球發燒友，與日本研究系嘅LynneNakano博士係混合雙打拍檔，聽講中野小姐來自夏威夷，自細就打網球，好波過文博士，故此呢對混雙拍檔經常贏波。李明逵帶來甚麼禮物呢？珍貴咯，係李一哥在內地見到中國網球高手鄭潔，鄭潔送上一個佢自己親筆簽名嘅，自己用過嘅網球拍，交畀文博士。大家聽完李一哥講球拍來源，齊齊大嗌：「Dr.Man，唔好將球拍拎去eBay拍賣。」文博士接過球拍，笑到見牙唔見眼，大概聽唔到大家嗌乜。左丁山對佢講：「既然係家住雪梨，明年一月不妨揸車去墨爾本，為參加澳洲公開賽替鄭潔打氣，高舉呢個球拍，高呼鄭潔加油！」
開心過後，左丁山通知大家，收到市場學退休教授董何淑貞電郵，傳來沉痛消息，已退休之工商管理學系特任導師陳纘揚在四月十七日於中國中風不治逝世，定於五月十二日在鑽石山火葬場出殯，早一晚（十一日）晚上設靈，以基督教形式舉行，由八時至九時。陳纘揚別號Dem陳，七一年新亞工管系畢業後到UBC讀MBA，返嚟香港就入咗中大做Tutor，點知一做三十餘年，前兩年先至退休，教過無數工管系學生，包括新亞校董會主席梁英偉及校董林榮德等等。心臟病係香港人嘅主要殺手，最近接連聽到不同朋友中風，為之心寒。Dem陳素來生活樸素，不愛煙酒，身形偏瘦與博士W差不多，想來心臟病患與肥瘦無關，唔好以為自己勤運動，標準身材就誤認為心臟健康！