一直想落腳港島嘅民主黨副主席單仲偕又跣腳，早前在太古城附近物色咗個700幾呎、月租10,000蚊左右商廈單位，擬開設地區服務處，點知業主最後一刻耍手唔簽約，據講係怕租畀政黨會引來示威者，恐怕影響其他租客，所以請單仲偕食檸檬。
真金白銀租地方都不受歡迎，單仲偕覺得好無奈，好彩仲有兩年先選舉，仲有時間搵地方。單仲偕係西九管理局董事，西九有的是地方，有冇興趣喺西九開地區服務處呢？
下月中單仲偕會同家人去南非睇世界盃，7月3號先返香港，7.1遊行唔使預佢，如果民主黨開會員大會表決是否支持政改方案，話會將授權票畀佢最信得過嘅主席何俊仁，由仁哥揸主意。