新世代乜都講有機，有機生果、有機菜早已大行其道，家連床上用品都有有機枕頭、床褥。寢具用品牌子Sinomax噚日推出一系列有機環保枕頭，搞到藝人楊怡飛身走到銅鑼灣崇光Sinomax專門店，攞咗個返屋企試用。楊怡話本身有皮膚敏感，「等有機枕都等咗好耐」。
遲啲出埋有機床褥
楊怡又話，本身頸椎有啲問題，揀枕頭都好有學問，佢教路話買枕頭一定要即場試用，睇吓瞓得舒唔舒服，「買錯咗好影響睡眠質素。」
Sinomax品牌總監Raymond同小妹話，呢個係全球首個有機太空棉枕頭，做法係發泡過程中採用有機大豆油提煉嘅多元醇，取代傳統用石油提煉嘅化學乙二醇，環保之餘，有機棉嘅透氣同溫感功能大大提高，氣味較傳統嘅海綿溫和同清新。枕頭套用比利時有機棉，不含化學物質，可以減低皮膚敏感，「有機枕頭分大人同小朋友兩種，分別賣$729同$599，遲啲出埋有機床褥。」
家庭醫生關嘉美話，家大家都知道化學物質會令免疫系統失調，又增加患癌風險，所以反璞歸真採用有機產品。枕頭、床褥等床上用品採用有機物料係好事，減少巿民接觸化學物嘅機會，有機棉又可以防止皮膚敏感，但希望唔好掛羊頭賣狗肉。關醫生又話，買枕頭固然要試瞓，買完返嚟仲要常清洗免積塵蟎。
電郵：mailto:[email protected]