王菀之與張敬軒早前為音樂劇《柯迪夫Octave》拍攝電影海報，過氣緋聞情人作狀咀嘴，軒仔讚Ivana瘦得惹火又美麗，真想咀她，卻慘遭Ivana請食檸檬，笑指不想海報變三級，又謂自己落妝畫面就會很三級，張敬軒落妝則會變成四級畫面。
王菀之（Ivana）、張敬軒將與梁祖堯於七月三日開始，在演藝學院演出《柯迪夫Octave》音樂劇，早前三人拍攝宣傳海報，Ivana剛好抱恙，上吐下瀉腸胃炎，她穿上大會安排的性感短裙時，衣服鬆得要用很多夾子來固定，免得掉下來大出洋相，她亦要不時用手拉住裙子。
炮製三級海報
軒仔見狀笑讚Ivana瘦得性感惹火又美麗，後來這對過氣緋聞情人被要求自由擺甫士，她們竟作狀咀嘴，只是嘴唇沒有真的碰到，軒仔笑說：「你哋快啲影啦，再耐啲我真係想咀落去o架，Ivana今日咁靚。」Ivana即笑說：「係咪想張海報變三級先，唔使咀咁麻煩啦，我落咗妝咪三級囉，為咗票房我願意犧牲！或者軒仔落妝咪變四級囉！」
唔想益晒軒仔
Ivana笑軒仔口花花：「今日都唔算最性感，我人生第一次性感一早畀咗張敬軒，嗰次做佢演唱會嘉賓，心口一日低過一日呀。」至於第一次咀嘴會否也獻給軒仔？她笑說：「要諗吓先，乜都畀晒佢咪好益佢，要咀梗係最好同男朋友或者未來老公咀啦。」
Ivana在劇中演惡護士，軒仔則飾演一名背棄了夢想的狂躁工人，他謂對他是一大考驗，況且又可跟舞台劇泰斗如梁祖堯合作，實在很有壓力。
撰文：丁寧