冰王胡文新變快閃黨
（左圖）講起合和實業（054）太子爺胡文新Thomas，除咗冰上曲棍球，都係冰上曲棍球！身兼香港業餘冰球會主席、香港冰球訓練學校創辦人兼主席嘅Thomas，噚日又趁lunchtime飛車去九龍灣MegaBox出席「2010MegaIce五人冰球賽」成年組賽事揭幕禮，熱衷成咁，真係堪稱「香港冰王」！話晒係城中鑽石王老五，Thomas次次蒲親頭都俾人「圍」，佢又多數好合作。但唔知點解噚日主持完揭幕禮就做快閃黨，問佢對政府出招壓樓市點睇，佢都只係事後透過公關回應：「樂於見到樓市可以健康發展。」唔知係咪驚自己講大咗俾阿爸鬧呢？ 程志遠攝
獅王開班教o靚仔理財
（右圖）學生哥要建立正確嘅金錢觀，唔可以淨係靠學校同父母，如果有多啲好似滙豐銀行咁嘅機構，花時間向後生仔灌輸正確金錢觀，香港明天一定會更好！打理好多錢嘅獅子行，為學界推出嘅「滙豐理財學堂」，超過300個高中學生參加，由滙豐香港區個人理財業務主管麥倩華同學生哥分享個人理財經驗。麥倩華話自己16歲已經做兼職賺零用錢，部份人工儲起佢，其他用嚟買雜誌同買衫。不過佢都提醒啲後生仔，用錢最緊要分清楚「想要」同「需要」，唔好因為一時衝動搞出大頭佛呀！